Read Iloko Psalms 105 Bible Online

Psalms 105 - Iloko bible

Psalms 105

¹Agyamankay iti Apo, ket iwaragawagyo ti naindaklan a naganna. Ipakaammoyo kadagiti tattao dagiti inaramidna!

²Agkantakayo iti pagdaydayaw iti Apo; Saritaenyo ti amin a nakaskasdaaw nga inaramidna!

³Agrag-otayo ta kukuanatayo ti Apo; agragsak koma amin nga agserserbi kenkuana!

⁴Inkayo agpatulong iti Apo; agdaydayawkayo a kanayon iti imatangna!

⁵Dakayo a kaputotan ni Abraham nga adipenna; dakayo nga annak ni Jacob a pinilina: laglagipenyo dagiti nakaskasdaaw nga inaramidna, dagiti milagro ken pangngeddeng nga impaulogna.

⁷Ti Apo ti Diostayo; dagiti bilinna agpaay iti entero a daga.

⁸Silalagip nga agnanayon iti katulaganna, kadagiti karina iti rinibu a kaputotan.

⁹Tungpalenna ti nagtulaganda ken ni Abraham, ken ti inkarina ken ni Isaac.

¹⁰Nakitulag ti Apo ken ni Jacob iti agnanayon awan inggana, iti mataginayon nga annuroten ni Israel.

¹¹“Itedko kenka ti Canaan,” kinunana. “Tagikuaemto ti daga iti agnanayon awan inggana.”

¹²Dagiti tattao ti Dios, bassit pay idi ti bilangda; sadiay, sumagmamanoda laeng ken ganggannaetda.

¹³Nagalla-allada kadagiti nadumaduma a pagilian; nagalis-alisda a nagnaed kadagiti pagarian.

¹⁴Ngem dina impalubos a maparigatanda ket dagiti ari inna binallaagan ida

¹⁵tapno dagiti pinilina a profeta ken adipen saanda ida a ranggasan.

¹⁶Idi inyeg ti Apo ti bisin iti dagada, ket inikkatna amin a makanda,

¹⁷nangibaon iti umun-una ngem isuda, ni Jose a nailako idi a kas tagabu.

¹⁸Kinawaranda dagiti sakana, inikkanda iti landok a koliar ti tengngedna,

¹⁹agingga a natungpal ti impadtona. Pinaneknekan ti sao ti Apo a nalinteg ni Jose.

²⁰Nagbaon ngarud ti ari ket pinawayawayaanna; wen, winayawayaan ti agturay kadagiti nasion.

²¹Insaadna a mangaywan iti pagturayanna, insaadna a mangituray iti entero a daga.

²²Dinutokanna nga agturay kadagiti ofisialesna ken mangisuro kadagiti mammagbaga kenkuana.

²³Napan dagiti Israelita idiay Egipto kalpasanna, ket nagnaedda iti dayta a daga.

²⁴Adu nga annak ti imparabur ti Apo kadagiti tattaona, ket nagbalinda a napigpigsa ngem dagiti kabusorda.

²⁵Pinataudna ti gura dagiti Egipcio kadagiti tattaona, ket sinikapanda dagiti adipenna.

²⁶Imbaonna ni Moises nga adipenna, agraman ken ni Aaron a pinilina.

²⁷Impakitada dagiti nakaskasdaaw a gapuanan ti Dios, ket nagaramidda kadagiti milagrona idiay Egipto.

²⁸Inyegna ti sipnget ket nagsipnget ti daga, ngem di tinungpal dagiti Egipcio ti bilinna.

²⁹Pinagbalinna a dara dagiti karayanda, ket natay dagiti amin nga ikanda.

³⁰Napno iti nakaad-adu a tukak ti dagada uray pay iti palasio ti ari, nagdudupudopda.

³¹Nagbilin ti Apo ket nakaad-adu a ngilaw ken timel ti nagsaknap iti daga.

³²Saan a tudo no di ket yelo ti inyegna, ken agkanabsiit a kimat ti imbaonna.

³³Dinadaelna dagiti ubas ken igosda, tinuangna amin a kayo iti entero a daga.

³⁴Nagbilin ket immay dagiti dudon riniwriwriw ket di mabilang ti kaaduda.

³⁵Kinnanda amin a mula iti dagada ken inkisapda ti amin nga apit, awan natda.

³⁶Idiay Egipto, pinatayna dagiti inauna nga annak iti amin a familia.

³⁷Kalpasanna, inruarna dagiti Israelita, nagawitda kadagiti pirak ken balitok; napigsa ken nasalun-atda amin a sangapada.

³⁸Kasta unay ti buteng dagiti Egipcio kadakuada, ket naragsakanda idi pumanaw dagiti Israelita.

³⁹Nangikabil iti ulep a manglinong kadakuada, iti rabii, apuy ti nagpaay a silawda.

⁴⁰Nagdawatda ket pinataudna dagiti tukling, inikkanna ida iti nawadwad a tinapay manipud langit.

⁴¹Pinagrengngatna ti bato, ket pimsuak ti danum, kasla karayan a nagayus idiay let-ang.

⁴²Nalagipna ti katulaganna, ti nasantoan a karina ken ni Abraham nga adipenna.

⁴³Ket inruarna dagiti pinilina a tattaona; siraragsakda a nagkanta ken nagdidir-i iti rag-oda.

⁴⁴Ti daga dagiti ganggannaet intedna kadakuada, ket binay-anna a sakupen dagiti tattaona

⁴⁵tapno tungpalenda dagiti linteg ken bilinna. Madaydayaw ti Apo!