Read Iloko Psalms 106 Bible Online

Psalms 106 - Iloko bible

Psalms 106

¹Madaydayaw ti Apo! Agyamankayo iti Apo, ta isu ket naimbag; saan nga agpatingga ti di agbalbaliw nga ayatna!

²Siasino ti makaibaga kadagiti amin a nakaskasdaaw nga aramid ti Apo? Siasino ti makaipaay iti naan-anay a pagdaydayaw kenkuana?

³Nagasat dagiti mangtungpal iti bilinna ken kanayon a nalinteg ti aramidna.

⁴Lagipennak, O Apo, inton paraburam dagiti tattaom; Tulongannak kadi inton isalakanmo ida.

⁵Kayatko a makita ti irarang-ay dagiti tattaom, ket mairamanak iti ragsak ken rag-o dagiti pinilim a kukua.

⁶Nagbasolkami a kas kadagidi kapuonanmi; naglabsingkami ket dakes dagiti inaramidmi.

⁷Idi adda dagiti kapuonanmi idiay Egipto, dida inkankano dagiti nakaskasdaaw nga aramidmo. Nalipatanda dagiti adu nga ayat nga impaaymo, sinukirda ketdi ti Mannakabalin-amin iti Nalabaga a Baybay.

⁸Nupay kasta, insalakanna ida kas inkarina, tapno maipakita ti naindaklan a pannakabalinna.

⁹Binilinna ti Nalabaga a Baybay ket nagmaga, ket impanguloanna dagiti tattaona a bimmallasiw a nagna iti namaga a daga.

¹⁰Insalakanna ida kadagiti gumurgura kadakuada; inispalna ida kadagiti kabusorda.

¹¹Nalmes dagiti kabusorda a kumamkamat, awan ti siasinoman kadakuada ti nakalasat.

¹²Iti kasta, namati dagiti tattaona kadagiti karina, ket nagkantada kadagiti pagdaydayaw kenkuana.

¹³Ngem iti apagbiit nalipatanda ti inaramidna; nagtignayda a dida inuray ti patigmaanna.

¹⁴Idi addada iti let-ang nalabes ti gartemda ket sadiay sinuotda ti Dios.

¹⁵Iti kasta, intedna ti kinalikagumanda, inyegna pay ti nakaro a sakit kadakuada.

¹⁶Idi addada idiay let-ang, inapalanda ni Moises, kasta met ni Aaron a nasantoan nga adipen ti Apo.

¹⁷Nagrengngat ti daga ket inalun-onna ni Datan, nagaburan ni Abiram ken ti familiana.

¹⁸Bimmaba ti apuy kadagiti pasurotda, ket dagiti dakes a tattao naikisapda.

¹⁹Nagaramidda iti sinan-baka a balitok idiay Horeb, ket nagrukbabda iti daytoy nga imahen.

²⁰Sinuktanda ti dayag iti imahen ti animal a ruot ti kanenna.

²¹Linipatanda ti Dios a nangisalakan kadakuada babaen kadagiti nakaskasdaaw nga aramidna idiay Egipto.

²²Datdatlag dagiti pasamak iti Nalabaga a Baybay.

²³Idi imbaga ti Dios a pukawenna dagiti tattaona, bimmallaet ni Moises nga adipen a pinilina, ket dina impatuloy a bumtak ti pungtotna a mangdadael kadakuada.

²⁴Linaksidda ti napintas a daga, ta dida namati a tungpalen ti Dios ti karina.

²⁵Nagtantanabutobda iti uneg ti toldada, ket saanda nga impangag ti Apo.

²⁶Isut' gapuna a binallaaganna ida; insapatana a pukawenna ida iti let-ang,

²⁷ket iwarasna dagiti kaputotanda kadagiti pagilian, bay-anna ida a matay kadagiti ganggannaet a daga.

²⁸Nakipagdaydayaw met dagiti tattao ti Dios ken ni dios a Baal idiay Peor, ket nanganda kadagiti taraon a naidaton kadagiti awan biagna a didiosen.

²⁹Pinagpungtotda ti Apo gapu kadagiti aramidda, ket rimsua ti nakaro a didigra kadakuada.

³⁰Ngem nakibiang ni Finees ket dinusana ti nakabasol, iti kasta, simmardeng ti didigra.

³¹Manipud idin, naibilang kenkuana daytoy a kas kinalinteg malaglagip ti inaramidna iti agnanayon awan inggana.

³²Pinagpungtotda ti Apo idiay ubbog ti Meriba, ket nagsagaba ni Moises gapu kadakuada.

³³Sinugatda ti riknana, nagsakit ti nakemna, ket nagubsang dagiti sao nga insawangna; dina pinampanunot no umno dagiti imbagana.

³⁴Kinuna ti Apo a patayenda dagiti tattao iti likmutda, ngem saanda a tinungpal ti imbilinna.

³⁵Nakiasawada ketdi kadakuada, ket tinuladda dagiti ugalida.

³⁶Nagdaydayawda kadagiti didiosenda, ket daytoy ti nakaigapuan ti pannakadadaelda.

³⁷Pinuoranda dagiti annakda a kas daton kadagiti demonio

³⁸ken kadagiti dios ti Canaan, pinapatayda dagiti awan basolna ket namulitan ti daga iti dara.

³⁹Iti kasta nga aramidda, tinulawanda dagiti bagbagida, ket tinallikudanda ti Dios.

⁴⁰Gapu itoy, nakapungtot ni Yahweh kadagiti pinilina; ginurana dagiti tattaona.

⁴¹Inyawatna ida iti pannakabalin dagiti pagilian, ket inturayan ida dagiti gumurgura kadakuada.

⁴²Iti ima dagiti kabusorda, naparparigat ken naidadanesda, ket naan-anay ti panangiturayda kadakuada.

⁴³Namin-adu nga insalakan ni Yahweh ida, ngem inkeddengna ti panangsukirda kenkuana, ket nairemremda iti kinadakesda.

⁴⁴Nupay kasta, impangag ni Yahweh ti asugda, ket tinalliawna ti pakarigatanda.

⁴⁵Gapu kadakuada, linagipna ti katulaganna, ket nagbabawi gapu iti naindaklan nga ayatna.

⁴⁶Inallukoyna ti rikna dagiti nangadipen kadakuada a nangaasi kadakuada.

⁴⁷Isalakannakami, O Apo a Diosmi, ket alaennakami manipud kadagiti pagilian, tapno makapagyamankami ket idaydayawmi ti nasantoan a naganmo.

⁴⁸Idaydayawyo ti Apo a Dios ti Israel; idaydayawyo ita ken iti agnanayon awan inggana. “Amen!” kuna koma ti tunggal maysa. Madaydayaw ti Apo!