Read Iloko Psalms 107 Bible Online

Psalms 107 - Iloko bible

Psalms 107

¹“Agyamankayo iti Apo, ta isu ket naimbag; agpaut nga agnanayon ti ayatna!”

²Sawenyo dagitoy a balikas iti panagrukbabyo iti Apo, dakay amin a sinubbotna. Inispalnakay iti ima dagiti kabusoryo.

³Innalanakayo kadagiti ganggannaet a pagilian; inummongnakayo manipud iti amianan ken abagatan, manipud iti laud ken daya.

⁴Adda dagiti nagkalkallautang iti let-ang, saanda a nasurotan ti dalan nga agturong iti siudad nga inda pagnaedan.

⁵Nagsagabada iti bisin ken waw, ket amin a namnamada inda napukaw.

⁶Immawagda iti Apo idi marigatanda, ket inispalna ida iti narikut a kasasaadda.

⁷Inturongna ida iti nalinteg a dalan agingga a dimtengda iti siudad a pagtaenganda.

⁸Rumbeng ngarud nga agyamanda iti Apo gapu iti di agbalbaliw nga ayatna, gapu kadagiti nakaskasdaaw nga impaayna kadakuada.

⁹Painumenna dagiti mawaw; ikkanna iti agkakaimbag a banag dagiti mabisin.

¹⁰Adda nagbibiag iti lidem ken sipnget; balud nga agsagsagaba gapu iti pannakakawarda,

¹¹gapu ta sinukirda dagiti bilin ti Dios, ket linaksidda ti pannursuro ti Kangatoan.

¹²Nautoyanda iti nadagsen a trabahoda; maidasayda ket awan ti tumulong kadakuada.

¹³Immawagda iti Apo idi marigatanda, ket inispalna ida iti pakarigatanda.

¹⁴Manipud iti lidem ken sipnget, inaonna ida, ket pinugsapugsatna dagiti kawarda.

¹⁵Rumbeng ngarud nga agyamanda iti Apo gapu iti di agbalbaliw nga ayatna, gapu kadagiti nakaskasdaaw nga impaayna kadakuada.

¹⁶Rakrakenna dagiti ruangan a gambang ket tukkolenna dagiti balunet a landok.

¹⁷Nagsakit ti dadduma gapu iti basbasolda; nagsagabada gapu iti kinadakesda.

¹⁸Karurodda ti aniaman a makan a makitada ket iti ruangan ni patay, immasidegda.

¹⁹Immawagda iti Apo idi marigatanda, ket inispalna ida iti narikut a kasasaadda.

²⁰Pinaimbagna ida babaen iti panagbilinna, ket inispalna ida iti pakadadaelanda.

²¹Rumbeng ngarud nga agyamanda iti Apo gapu iti di agbalbaliw nga ayatna, gapu kadagiti nakaskasdaaw nga impaayna kadakuada.

²²Rumbeng nga agyamanda ket agpuorda iti datonda; masapul nga agkantada kadagiti naragsak a kanta a mangipakammo kadagiti aramidna.

²³Adda dagiti naglayag iti barko; nanggedda iti taaw babaen iti panagkomersio.

²⁴Nakitada ti kabaelan nga aramiden ti Apo, dagiti nakaskasdaaw a gapuananna iti taaw.

²⁵Nagbilin ket nagangin iti napigsa; dadakkel a dalluyon ti pinataudna.

²⁶Inyallon dagiti dalluyon dagiti barko a naglugananda, ket limnedda iti lansad ti taaw. Iti kasta a peggad, napukaw ti namnamada.

²⁷Kasda la nabartek a maiparparusisi ken agibar-ibar; awanen ti serserbi ti amin a laingda.

²⁸Immawagda iti Apo idi marigatanda, ket inispalna ida iti narikut a kasasaadda.

²⁹Pinagkalmana ti bagio a napigsa ket dagiti dalluyon nagtalnada.

³⁰Gapu iti linak nagragsakda, inturong ida ti Apo iti sangladan a kayatda.

³¹Rumbeng ngarud nga agyamanda iti Apo gapu iti di agbalbaliw nga ayatna, gapu kadagiti nakaskasdaaw nga impaayna kadakuada.

³²Masapul nga ipakaammoda ti kinatan-okna iti tallaong dagiti umili, ket idaydayawda iti taripnong dagiti panglakayen.

³³Pinagmaga ti Apo dagiti karayan, ket pinagsardengna nga agayus dagiti burayok.

³⁴Pinaapgadna ti nadam-eg a daga gapu iti kinadakes dagiti agnaed.

³⁵Pinagbalinna a dan-aw dagiti let-ang, ket pinagubbogna ti natikag a daga.

³⁶Sadiay, pinagtaengna dagiti mabisin a tattao, ket nangbangonda iti siudad a pagnaedanda.

³⁷Nagbunobonda iti kataltalonan; nagmulada iti ubas ket nagapitda iti aglablabonan.

³⁸Binendisionanna ida ket adu nga annak ti naiparabur kadakuada; dina impalubos a bumassit ti bilang dagiti bakada.

³⁹Idi maparmek ken maibabain dagiti tattao ti Dios, babaen iti nadawel a pannakaidadanes ken panagsagabada,

⁴⁰impakitana ti gurana kadagiti mamarparigat kadakuada, ket pinagkallautangna ida kadagiti let-ang.

⁴¹Ngem inalawna dagiti napanglaw manipud iti rigatda, ket pinaaduna a kasla arban dagiti familiada.

⁴²Makita daytoy dagiti nalinteg ket agragsakda; ngem mapaulimek dagiti nakillo ken dakes.

⁴³Panunoten koma dagitoy dagiti adda siribna; ket ti napudno nga ayat ti Apo bigbigenda.