Read Iloko Psalms 108 Bible Online

Psalms 108 - Iloko bible

Psalms 108

¹Sisasaganaak, O Dios, wen, sisasaganaak! Agkantaakto ket agdaydayawak kenka. O kararuak, agriingka!

²Agriingkayo, lirak ken arpak, ket riingek ti bannawag.

³Agyamanak kenka, O Apo, iti imatang dagiti pagilian. Ikantakto ti pagdaydayaw kenka iti imatang sabali a tattao.

⁴Ringbawan ti di agbalbaliw nga ayatmo ti langit; dumanon iti tangatang ti kinapudnom.

⁵Iparangmo sadi langit, O Dios, ti tan-okmo, ken iti entero a daga, ti dayagmo.

⁶Isalakannakami babaen iti bilegmo ket dumngegka iti kararagko tapno maispal dagiti ay-ayatem a tattao.

⁷Kinuna ti Dios manipud iti santuariona, “Bingbingayekto ti Sikem inton agballigiak, ket ti tanap ti Succot innakto iwaras.

⁸Kukuak ti Galaad ken ti Manases; ti Efraim ti helmetko, ket ti Juda ti bukodko a setro.

⁹Ngem aramatekto ti Moab a pagbuggoak; ipurruakkonto ti sandaliasko iti Edom, ket iti Filistia umkisakto iti panagballigik.”

¹⁰Siasinonto, O Dios, ti manguyog kaniak iti nasarikedkedan a siudad? Siasinonto ti mangipan kaniak idiay Edom?

¹¹Pudno aya a binaybay-annakamin? A dikanton kumuyog kadagiti armadami?

¹²Tulongannakami a sumaranget kadagiti kabusormi, ta awan serserbi ti maitulong ti tao kadakami.

¹³Agballigikamto babaen iti tulong ti Dios; parmekennanto dagiti kabusormi.