Read Iloko Psalms 109 Bible Online

Psalms 109 - Iloko bible

Psalms 109

¹Idaydayawka, O Dios; saanka koma nga agulimek.

²Ta dinarupdak dagiti dakes ken ulbod a tattao, saan a pudno ti sasawenda maipapan kaniak.

³Agkakadakes a banag ti sarsaritaenda; kabilendak nga awan gapgapuna.

⁴Busorendak, nupay ay-ayatek ida, ken ikarkararagak ida.

⁵Dakes ti isupapakda kaniak iti naimbag nga impaayko; gura ti isubadda iti ayatko.

⁶Mangdutokka iti rinuker nga ukom a mangusig iti kabusorko, ket aramatem ti maysa kadagiti kabusorna a mangidarum kenkuana.

⁷Maukom koma ket maikeddeng a nakabasol; uray pay ti kararagna, maibilang koma a basol.

⁸Matay koman iti mabiit, alaen koma ti sabali a tao ti saadna.

⁹Maulila koma dagiti annakna, ket mabalo koma ti asawana.

¹⁰Agpalpalama koma nga awan taengda dagiti annakna; mapapanawda koma iti rebba a pagnaedanda.

¹¹Alaen koma dagiti nakautanganna ti amin a sanikuana; agawen koma met dagiti ganggannaet ti amin a nagbannoganna.

¹²Awan koma ti mangngaasi kenkuana; awan koma ti mangaywan kadagiti inulilana.

¹³Matay koma amin a kaputotanna, ket malipatan ti naganna iti sumaruno a kaputotan.

¹⁴Malagip koma ti Apo ti kinadakes dagiti kapuonanna, ket dina pakawanen ti basol ni inana.

¹⁵Kanayon koma a silalagip ti Apo kadagiti basolda, ngem naan-anay koma ti pannakalipat iti naganda.

¹⁶Saan a pulos napanunot dayta a tao ti nangngaasi; indadanes ken pinapatayna dagiti napanglaw, dagiti mairurumen ken nakaay-ay-ay.

¹⁷Pagay-ayatna idi ti agilunod—mailunod met koma! Dina kinayat idi ti mangparabur— awan koma met ti mangparabur kenkuana.

¹⁸Kas iti kalakana nga agkawes ti kalakana nga agilunod. Kasla danum koma a mangrusep dagiti lunod iti bagina, kasla lana a sumagepsep iti tultulangna.

¹⁹Kasda la koma lupot a mangabbong kenkuana ken kanayon koma a kasda la barikes a putipotna!

²⁰Kasta koma ti panangdusam, O Apo, kadagiti a mamadpadakes kaniak a kabusorko.

²¹Ngem tulongannak kadi kas inkarim, O Apok a Dios, ket isalakannak gapu ta naimbag ti ayatmo.

²²Napanglaw ken nakakaasiak; nasaem ti sugat toy pusok.

²³Anniniwan nga agpukaw iti malem ti arigko, kaslaak dudon iti pannakaipalpalaisko.

²⁴Agkutukot dagiti tumengko gapu iti kaawan taraonko; nakuttongak, tulang ken kudil laengen ti nangbungon kaniak.

²⁵Katawaandak dagiti tattao no makitadak; agwingwingiwingda a manglalais kaniak.

²⁶Tulongannak kadi, O Apo a Diosko; isalakannak gapu iti di agbalbaliw nga ayatmo.

²⁷Ipakaammom kadagiti kabusorko a sika ti mangisalakan kaniak.

²⁸Nalabit nga ilunoddak, ngem bendisionannak. Maabak koma dagiti mangidadanes kaniak, ket kas adipenmo, maragsakanak.

²⁹Malmes koma iti bain dagiti kabusorko; ikawesda koma a kas kagay ti pakaibabainanda.

³⁰Ipukkawkonto dagiti panagyamanko iti Apo; idaydayawkonto iti gimong dagiti tattao,

³¹agsipud ta salaknibanna dagiti marigrigat, ket ispalenna kadagiti mangikeddeng a mapapatay.