Read Iloko Psalms 111 Bible Online

Psalms 111 - Iloko bible

Psalms 111

¹Madaydayaw ti Apo. Iti amin a pusok, agyamanakto iti Apo iti taripnong dagiti tattaona.

²Nakaskasdaaw dagiti aramid ni Yahweh; ti amin a maay-ayo kadakuada utobenda tapno maawatanda.

³Nadaeg ken nadayag dagiti aramidna; agnanayon ti kinalintegna.

⁴Saan nga ipalubos ti Apo a lipatenyo dagiti nakaskasdaaw nga aramidna; managparabur ken manangngaasi ti Apo.

⁵Taraonanna dagiti agbuteng kenkuana; silalagip a kanayon iti katulaganna.

⁶Imparangna kadagiti tattaona ti pannakabalinna idi intedna kadakuada ti daga dagiti ganggannaet.

⁷Napudno ken nalinteg ti amin nga aramidna; mapangnamnamaan amin a bilbilinna.

⁸Agpautda nga agnanayon awan inggana; naaramidda iti kinapudno ken kinalinteg.

⁹Winayawayaanna dagiti tattaona; nangaramid iti katulagan nga agnanayon nga awan inggana. Nasantoan ken mannakabalin ti naganna.

¹⁰Ti panagbuteng ken ni Yahweh ti pangrugian ti kinasirib. Ikkanna iti pannakaawat dagiti amin nga agtungpal kenkuana. Mataginayon ti pannakaidaydayawna!