Read Iloko Psalms 116 Bible Online

Psalms 116 - Iloko bible

Psalms 116

¹Ay-ayatek ti Apo, ta ipangagnak; denggenna dagiti kararagko.

²Yallingagna kaniak dagiti lapayagna tunggal umawagak kenkuana.

³Pinulipolandak dagiti tali ni patay; natnagak kadagiti palab-og ni tanem; napnoak iti buteng ken danag.

⁴Iti kasta, immawagak iti Apo, “Agpakpakaasiak, O Apo, nga ispalennak!”

⁵Managparabur ken managayat ti Apo; wen, manangngaasi ti Diostayo.

⁶Salakniban ti Apo dagiti awan gawayna; inispalnak idi nagpeggadak.

⁷O kararuak, agtalgedka, ta naimbag ti Apo kenka.

⁸Inispalnak ti Apo iti ngarab ni patay; pinagsardengna dagiti luluak, ket linapdanna ti pannakaitibkolko.

⁹Ngarud, iti imatang ti Apo magnaak iti lubong dagiti sibibiag.

¹⁰Saan a mapukaw ti pammatik uray idi kinunak, “Naan-anay ti panagsagabak.”

¹¹Uray idi mabutbutengak, kinunkunak, “Awan ti mapagtalkan a tao.”

¹²Ania ti mabalinko a pangsubad iti Apo kadagiti imbag nga impaayna kaniak?

¹³Mangidatagakto iti daton nga inumen a pagyamanko kenkuana iti panangisalakanna kaniak.

¹⁴Iti imatang dagiti amin a tattaona, tungpalekto ti inkarik kenkuana.

¹⁵Maseknan unay ti Apo no matay ti maysa kadagiti pinilina.

¹⁶Adipennak, O Apo, agserbiak kenka kas iti panagserbi daydi nanangko. Intedmo kaniak ti wayawaya.

¹⁷Iruknoykonto kenka ti daton a pagyaman, ket idatagkonto kenka ti kararagko.

¹⁸Iti taripnong dagiti amin a tattaom, iti paraangan ti balay ti Apo idiay Jerusalem, tungpalekto ti inkarik kenkuana. Madaydayaw ti Apo!