Read Iloko Psalms 118 Bible Online

Psalms 118 - Iloko bible

Psalms 118

¹Agyamankayo iti Apo, agsipud ta isu ket naimbag, agnanayon ti napudno nga ayatna.

²Kuna ngarud dagiti Israelita, “Agnanayon ti di agbalbaliw nga ayatna.”

³Kuna ngarud dagiti papadi ti Dios, “Agnanayon ti di agbalbaliw nga ayatna.”

⁴Kuna ngarud dagiti amin nga agbuteng iti Apo, “Agnanayon ti di agbalbaliw nga ayatna.”

⁵Immawagak iti Apo idi marigatanak; impangagnak ket winayawayaannak.

⁶Iti kaadda kaniak ti Apo, awan ti panagbutengko; ania ti maaramid kaniak ti tao?

⁷Adda kaniak ti Apo tapno tulongannak, ket mabuyakto ti pannakaparmek dagiti kabusorko.

⁸Nasaysayaat ti agkamang ken ni Yahweh, ngem ti agtalek iti tao.

⁹Nasaysayaat ti agkamang ken ni Yahweh, ngem ti agtalek kadagiti pangulo.

¹⁰Linawlawdak dagiti adu a kabusorko ngem pinarmekko ida babaen iti pannakabalin ti Apo.

¹¹Linikmutdak, wen, addada iti amin a suli, ngem pinarmekko ida babaen iti pannakabalin ti Apo.

¹²Kasda la alimbubuyog a nangaribungbong kaniak; simgiabda a kas iti kayo a siitan; iti nagan ti Apo inkisapko ida.

¹³Dinarupdak ket dandani naparmekak; ngem tinulongannak ti Apo.

¹⁴Ti Apo ti pigsa ken kantak; isu ti mangisalakan kaniak.

¹⁵Denggenyo ti naragsak a dir-i ti panagballigi, kadagiti tolda dagiti tattao ti Dios: “Aramid daytoy ti kannawan nga ima ti Apo!

¹⁶Ti bilegna ti namagballigi kadatayo; wen, ti nabileg a pannakabalinna iti gubat.”

¹⁷Saanakto a matay no di ket agbiagak, tapno ipakaammok dagiti aramid ti Apo.

¹⁸Nupay nakaro ti panangdusana kaniak, saanna nga impalubos a matayak.

¹⁹Luktanyo ti ruangan ti kinalinteg, ta sumrekak nga agyaman iti Apo!

²⁰Daytoy ti ruangan ti Apo; dagiti laeng nalinteg ti makastrek.

²¹Agyamanak kenka, O Apo, ta impangagnak, ken sika ti nangisalakan kaniak.

²²Ti bato nga imbelleng dagiti agipatpatakder, nagbalin a kangrunaan a pasuli.

²³Aramid daytoy ti Apo, anian a nakaskasdaaw iti imatangtayo!

²⁴Daytoy ti aldaw nga inaramid ti Apo. Agragsak ken agrambaktayo.

²⁵OApo, isalakannakami; dawatenmi kenka a pagballigiennakami.

²⁶Nagasat ti umay iti nagan ti Apo! Bendisionandakayo manipud iti balayna.

²⁷Ti Apo isut' Dios, ket inikkannatay iti silaw. Agiggemkayo kadagiti sangsanga, ket aglibutkayo a mapan iti altar.

²⁸Sika ti Diosko ket agyamanak kenka; ipaduyakyakko ti kinatan-okmo.

²⁹Agyamankay iti Apo, agsipud ta isu ket naimbag; agnanayon ti napudno nga ayatna.