Read Iloko Psalms 119 Bible Online

Psalms 119 - Iloko bible

Psalms 119

¹Nagasat dagiti awan mulit ti panagbiagna, nga agbibiag kas mayannurot iti linteg ti Apo!

²Nagasat dagiti mangtungpal kadagiti bilinna, wen, nagasat dagiti agtulnog kenkuana iti amin a pusoda.

³Pulos nga awan dakes nga aramidenda; magnada kadagiti dalan ti Apo.

⁴Intedmo kadakami, O Apo, dagiti linlintegmo, ket imbilinmo a tungpalenmi ida a siiinget.

⁵Sapay koma ta agtalinaedak a napudno a mangannurot kadagiti ipaalagadmo!

⁶Pulos nga awanto ti pannakaibabainko, no tungpalek dagiti amin a bilinmo.

⁷Agdaydayawakto kenka iti nadalus a puso, no masursurok dagiti nalinteg a pangngeddengmo.

⁸Tungpalek dagiti linlintegmo; dinak koma baybay-an uray inton kaano.

⁹Kasano a pagtalinaeden ti agtutubo ti nadalus a panagbiagna? Babaen iti panagtungpalna kadagiti bilinmo.

¹⁰Iti amin a pusok, ikagumaak ti agserbi kenka; dinak koma baybay-an a mayaw-awan iti panangtungpalko kadagiti bilinmo.

¹¹Idulinko dagiti lintegmo iti pusok tapno saanak nga agbasol kenka.

¹²Idaydayawka, O Apo; isurom kaniak dagiti daldalanmo.

¹³Ulitek nga iwaragawag iti napigsa dagiti amin a linteg nga inka inted.

¹⁴Naragsakak a mangtungpal kadagiti bilinmo, a kas iti panangikutko iti sanikua nga adu.

¹⁵Adalek dagiti pannursurom, ket imutektekak dagiti pammagbagam.

¹⁶Maragsakanak kadagiti lintegmo; saankonto a lipaten dagiti bilinmo.

¹⁷Paraburannak kadi, siak nga adipenmo, tapno agbiagak ket tungpalek dagiti pannursurom.

¹⁸Luktam dagiti matak tapno maimatangak dagiti nakaskasdaaw a kinapudno iti lintegmo.

¹⁹Ganggannaetak laeng ditoy rabaw ti daga; dimo kad ilinged kaniak dagiti bilinmo.

²⁰Iti amin a tiempo, mailiw unay toy kararuak kadagiti pangngeddengmo.

²¹Tubngarem dagiti natangsit a tattao; mailunod dagiti mangsalungasing kadagiti bilinmo.

²²Yadayonak iti panangibabain ken panangumsida, gapu ta tinungpalko dagiti lintegmo.

²³Uray no agtutulag dagiti pangulo a mangisikat kaniak, dagiti pannursurom adalen toy adipenmo.

²⁴Paragsakendak a kanayon dagiti pammagbagam; isuda dagiti mangbalbalakad kaniak.

²⁵Toy kararuak naidasag iti tapok; batakennak ngarud kas mayannurot iti saom.

²⁶Impudnok amin nga inaramidko ket impangagnak; isurom ngarud kaniak dagiti ipaalagadmo.

²⁷Isuronak tapno maawatak dagiti linlintegmo, ket adalek dagiti nakaskasdaaw nga aramidmo.

²⁸Nalapunosak iti liday ket maidasayak; papigsaennak kadi kas inkarim.

²⁹Yadayom kadi kaniak dagiti killo a wagas ket paraburannak nga agbiag iti lintegmo.

³⁰Inkeddengko ti agtulnog; inannurotko dagiti pangngeddengmo.

³¹Sinursurotko dagiti pannursurom, O Apo; saanmo koma nga ipalubos a maibabainak.

³²Tungpalek a sigagagar dagiti bilinmo gapu ta nayonam ti pannakaawatko.

³³Isurom kaniak, O Apo, ti kaipapanan dagiti linlintegmo, ket tungpalek ida iti amin a tiempo.

³⁴Ilawlawagmo kaniak ti lintegmo, ket tungpalek; iti amin a pusok, annurotek.

³⁵Pagtalinaedennak nga agtungpal kadagiti bilinmo, ta isuda ti pakasarakak iti ragsak.

³⁶Ikkannak iti tarigagay nga agtungpal kadagiti bilinmo a saan ket nga iti ibabaknangko.

³⁷Dimo ipalubos a mingmingak dagiti ubbaw a bambanag kas mayannurot iti inkarim, ikkannak iti biag.

³⁸Tungpalem ti karim kaniak nga adipenmo; wen, ti karim kadagiti agbuteng kenka.

³⁹Isalakannak kadagiti pakapabainan a kabutengko, nakaskasdaaw unay dagiti pangngeddengmo.

⁴⁰Mailiwak unay kadagiti bilbilinmo, biagennak kadi babaen iti kinalintegmo.

⁴¹Ipakitam, O Apo, no kasano ti panagayatmo kaniak; kas mayannurot iti inkarim, isalakannak.

⁴²Iti kasta, masungbatak dagiti mangpabain kaniak, agsipud ta agtalekak iti saom.

⁴³Tulongannak a kanayon nga agsao iti pudno agsipud ta ti namnamak adda kadagiti pangngeddengmo.

⁴⁴Kanayonto a tungpalek ti lintegmo; wen, tungpalek nga agnanayon awan inggana.

⁴⁵Agbiagakto a siwawaya, ta inannurotko dagiti ipaalagadmo.

⁴⁶Ipakaammokto dagiti bilinmo kadagiti ari, ket pulos nga awanto ti pannakaibabainko.

⁴⁷Maragsakanak nga agtungpal kadagiti bilinmo, agsipud ta ayatek ida iti amin a pusok.

⁴⁸Raemek ken ayatek dagiti bilinmo, ket utobekto dagiti pannursurom.

⁴⁹Lagipem ti karim kaniak nga adipenmo, isut' nangted kaniak iti namnama.

⁵⁰Uray iti panagsagabak, naliwliwaak, agsipud ta ti saom inikkannak iti biag.

⁵¹Inumsidak dagiti natangsit a tattao, ngem saanak a simmina iti lintegmo.

⁵²Malagipko dagiti pannursurom idi un-unana, ket mabang-aranak, O Apo.

⁵³No makitak dagiti managdakdakes a mangsalungasing iti linteg toy pungtotko kadakuada sumged.

⁵⁴Bayat ti ababa a panagbiagko ditoy daga ikankantak dagiti bilbilinmo.

⁵⁵Iti rabii, O Apo, sika ti malaglagipko, ket tungpalek ti lintegmo.

⁵⁶Naipaay kaniak daytoy a bendision gapu iti panagtungpalko kadagiti bilinmo.

⁵⁷Sika laeng, O Apo, ti masapulko; ikarik a tungpalen dagiti lintegmo.

⁵⁸Iti amin a pusok, agpakpakaasiak kenka; kas inkarim, kaasiannak koma.

⁵⁹Usiseg dagiti wagasmo ket sumurotak iti panangidalanmo.

⁶⁰Saanak nga agtaktak, dagdagusek a tungpalen dagiti bilinmo.

⁶¹Impakat dagiti managdakdakes ti pakatnagak, ngem diak latta malipatan ti lintegmo.

⁶²Iti tengnga ti rabii agriingak nga agdaydayaw kenka, gapu kadagiti nalinteg a pangngeddengmo.

⁶³Gayyemnak dagiti amin nga agtulnog kenka, wen, kaduadak dagiti agtungpal iti lintegmo.

⁶⁴Napno ti daga, O Apo, iti di agbalbaliw nga ayatmo, isurom kadi kaniak dagiti bilinmo.

⁶⁵Ti karim, O Apo, tinungpalmo, ket naimbagka unay kaniak nga adipenmo.

⁶⁶Ikkannak kadi iti sirib ken pannakaammo, gapu ta agtalekak kadagiti bilinmo.

⁶⁷Sakbay a dinusanak, nayaw-awanak ngem ita, tungpalekon ti saom.

⁶⁸Naimbag ken nadungngoka; isurom kaniak dagiti bilinmo.

⁶⁹Padpadaksendak dagiti natangsit a tattao, ngem iti amin a pusok, tungpalek dagiti ipaalagadmo.

⁷⁰Saan a makaaw-awat dagitoy a tattao, ngem masarakak ti rag-o iti lintegmo.

⁷¹Nagimbagak ti panangdusam kaniak, gapu ta nasursurok dagiti bilinmo.

⁷²Napatpateg kaniak dagiti linteg nga intuyangmo, ngem iti balitok ken pirak a rinibribu.

⁷³Pinarsuanak ket ay-aywanannak; ikkannak iti pannakaawat tapno masursurok dagiti lintegmo.

⁷⁴Maragsakan a kumita kaniak dagiti agbuteng kenka, gapu ta mangnamnamaak a matungpal ti karim.

⁷⁵Ammok, O Apo, a nalinteg dagiti pangngeddengmo, ket dinusanak ta napudnoka kaniak.

⁷⁶Liwliwaennak kadi ti napudno nga ayatmo, kas iti inkarim kaniak nga adipenmo.

⁷⁷Kaasiannak kadi tapno agbiagak gapu ta ti lintegmo ti pagragsakak.

⁷⁸Maibabain koma dagiti natangsit a mamadpadakes kaniak nga awan gapgapuna, ngem no siak, ammirisek dagiti pammagbagam.

⁷⁹Umay koma kaniak dagiti agraem kenka— Amin a makaammo kadagiti bilinmo.

⁸⁰Aramidek ti amin a kabaelak nga agtungpal kadagiti bilbilinmo tapno saanak a maibabain.

⁸¹Mautoyanak nga agur-uray iti panangisalakanmo, ngem ti saom ti kakaisuna a namnamak.

⁸²Nasakiten dagiti matak nga agur-uray iti inkarim, ket kunak, “Kaanonto nga umayka tumulong kaniak?”

⁸³Awan dumak iti naibelleng a pagikabilan iti arak, awan serserbik ngem diak malipatan dagiti bilinmo.

⁸⁴Kasano pay kabayag nga agur-urayak? Kaanonto ti panangdusam kadagiti mangidadanes kaniak?

⁸⁵Dagiti natangsit a tattao, isuda a di agtulnog iti lintegmo, nangkalida kadagiti abut a pakaipalab-ogak.

⁸⁶Mapagtalkan dagiti amin a bilbilinmo; tulongannak no idadanesdak dagiti naulbod.

⁸⁷Dandanida kinettel ti biagko, ngem diak binaybay-an dagiti bilinmo.

⁸⁸Ispalennak kadi ken patay gapu iti di agbalbaliw nga ayatmo tapno annurotek dagiti lintegmo.

⁸⁹Agpaut iti agnanayon ti saom, O Apo, naipasdek a mataginayon sadi langit.

⁹⁰Agpaut ti kinapudnom iti awan inggana, kas iti pannakataginayon ti impasdekmo a daga.

⁹¹Agingga ita, agtalinaed ti amin gapu iti bilinmo, agsipud ta agserbida amin kenka.

⁹²No saan a ti lintegmo ti paggapuan ti ragsakko, natayak koman gapu iti panagsagabak.

⁹³Saankonto a baybay-an dagiti ipaalagadmo, ta gapu kadakuada, tinaginayonmo toy biagko.

⁹⁴Kukuanak, isalakannak kadi, ta inkagumaak a tinungpal dagiti bilinmo.

⁹⁵Agur-uray dagiti managdakdakes a mangpapatay kaniak, ngem pampanunotek a naimbag dagiti lintegmo.

⁹⁶Naadalko a ti amin adda paggibusanda, ngem ti bilinmo agnanayon, awan patinggana.

⁹⁷Anian a panagayatko iti lintegmo! Agmalmalem nga ut-utobek.

⁹⁸Kanayon nga adda kaniak dagiti bilinmo; pagbalinendak a nasirsirib ngem dagiti kabusorko.

⁹⁹Addaanak iti nasaysayaat a pannakaawat ngem dagiti mamaestrok, gapu ta ammirisek dagiti pannursurom.

¹⁰⁰Nasirsiribak ngem dagiti lallakay, agsipud ta tungtungpalek dagiti bilinmo.

¹⁰¹Diak kayat a masursuro ti dakes a wagas gapu ta kayatko a tungpalen ti saom.

¹⁰²Diak binaybay-an dagiti pannursurom, ta sika met laeng ti nangisuro kaniak.

¹⁰³Nagsam-iten dagiti ipaalagadmo, wen, nasamsam-itda ngem ti diro.

¹⁰⁴Simmiribak gapu kadagiti lintegmo, ket kagurak ti dalan ti kinakillo.

¹⁰⁵Ti saom ti silaw a mangidalan kaniak, maysa a lawag iti dana a pagnaak.

¹⁰⁶Tungpalek ti sinapataak a karik a mangsurot kadagiti nalinteg a pannursurom.

¹⁰⁷Nadagsen unay dagiti sagabaek, O Apo; kas mayannurot iti karim, papigsaem ti biagko.

¹⁰⁸Awatem kadi, O Apo, ti kararagko a pagyaman, ket isuronak kadagiti bilinmo.

¹⁰⁹Sisasaganaak a kanayon a mangipusta iti biagko, saanko a malipatan ti lintegmo.

¹¹⁰Nangipakat dagiti managdakdakes iti silo, ngem diak sinalungasing dagiti bilbilinmo.

¹¹¹Agnanayon a sanikuak dagiti bilinmo, isuda ti ragsak toy puso.

¹¹²Inkeddengkon a tungpalen dagiti lintegmo; annurotek ida aginggat' maudi nga angesko.

¹¹³Kagurak dagiti saan a napudno kenka, ngem ipatpategko ti lintegmo.

¹¹⁴Sika ti salinged ken kalasagko, mangnamnamaak iti karim.

¹¹⁵Adaywandak, dakay a managdakdakes, tapno matungpalko dagiti bilin ti Diosko.

¹¹⁶Papigsaennak kas inkarim tapno agbiagak; saanmo koma nga upayen ti namnamak.

¹¹⁷Kibinennak tapno diak maan-ano, ket surotek a kanayon dagiti bilinmo.

¹¹⁸Laksidem dagiti di agtungpal kadagiti lintegmo, ta awan serserbi dagiti panggepda.

¹¹⁹Ibilangmo a basura ti amin a managdakdakes, isut' gapuna nga ipatpategko dagiti pannursurom.

¹²⁰Agtigtigergerak gapu iti amakko kenka, ket kabutengko dagiti pangngeddengmo.

¹²¹Inaramidko ti tumutop ken naimbag; dinak baybay-an iti ima dagiti mangidadanes kaniak.

¹²²Ikarim a tulongam toy adipenmo, dimo kad ipalubos a dagiti natangsit idadanesdak.

¹²³Nasakiten dagiti matak iti panagur-urayko, iti inkarim kaniak a panangisalakanmo.

¹²⁴Kitaennak kadi kas mayannurot iti di agbalbaliw nga ayatmo, ket isurom kaniak dagiti bilinmo.

¹²⁵Siak ti adipenmo; ikkannak iti pannakaawat tapno ammok dagiti pannursurom.

¹²⁶Tiempon nga agtignayka, O Apo, ta salsalungasingen dagiti tattao ti lintegmo.

¹²⁷Ipatpategko dagiti bilbilinmo; ipangpangrunak ngem ti puro a balitok.

¹²⁸Iti kasta, surotek amin a pannursurom, kagurak amin nga aramid nga ulbod.

¹²⁹Nakaskasdaaw dagiti pannursurom; ngarud, tungpalek ida iti amin a pusok.

¹³⁰Ti pannakailawlawag dagiti pannursurom, mangted iti lawag, ket pasiribenna dagiti nanumo.

¹³¹Agal-alak iti pannakautoyko a manegsegga kadagiti bilbilinmo.

¹³²Taliawennak kadi ket kaasiannak, kas iti ar-aramidem kadagiti agayat kenka.

¹³³Kas inkarim, dimo ipalubos a matnagak; dimo ipalubos a ti dakes iturayannak.

¹³⁴Subbotennak kadagiti mangidadanes kaniak tapno matungpalko dagiti bilinmo.

¹³⁵Agraniag koma ti rupam iti biagko, ket isuronak kadagiti lintegmo.

¹³⁶Kas karayan nga agayus dagiti luak, gapu kadagiti tattao a mangsukir iti lintegmo.

¹³⁷Nalintegka, O Apo, ket nalinteg met dagiti pangngeddengmo.

¹³⁸Nalinteg unay dagiti ipaalagadmo, natalgedda ken napudno.

¹³⁹Sumged ti pungtotko a kas apuy iti unegko, gapu ta binaybay-an dagiti kabusorko dagiti bilinmo.

¹⁴⁰Naan-anay ti pannakasuot ti karim, ket ay-ayaten unay toy adipenmo.

¹⁴¹Uray no mauy-uyawak ken nanumo diak lipaten dagiti ipaalagadmo.

¹⁴²Agnanayon nga awan inggana ti kinalintegmo, ket pudno dagiti pannursurom.

¹⁴³Riribuk ken sennaay ti manglapunos kaniak, ngem dagiti bilinmo ti pagragsakak.

¹⁴⁴Umno amin a pannursurom ken awan inggana; ikkannak iti pannakaawat tapno agbiagak.

¹⁴⁵Umawagak kenka, O Apo, iti amin a pusok. Ipangagnak kadi, ket tungpalekto dagiti bilinmo.

¹⁴⁶Umawagak kenka; isalakannak kadi, ket taginayonek dagiti lintegmo.

¹⁴⁷Sakbay a bumigat dumawatak kenka iti tulong; mangnamnamaak iti pannakatungpal ti saom.

¹⁴⁸Saanak a maturog, agpatpatnagak a siririing a mangam-amiris, mangut-utob iti karim.

¹⁴⁹Ipangagnak kadi, O Apo, kas mayallubog iti di agbalbaliw nga ayatmo. Ipakitam ti asim ket taginayonem ti biagko.

¹⁵⁰Umasidegen dagiti naranggas a mangidadanes kaniak; adtoyen dagiti di agtungpal iti lintegmo.

¹⁵¹Ngem asidegka kaniak, O Apo, ket agnanayon awan inggana ti amin a bilinmo.

¹⁵²Idi un-unana, naammoak a dagiti pannursurom inrantam ida nga agtalinaed iti agnanayon.

¹⁵³Kitaem kadi ti panagsagabak ket isalakannak, gapu ta diak binaybay-an ti lintegmo.

¹⁵⁴Ikalintegannak kadi ket wayawayaannak; kas mayannurot iti karim, isalakannak.

¹⁵⁵Saan a maisalakan dagiti managdakdakes, gapu ta dida tungpalen dagiti lintegmo.

¹⁵⁶Ngem naindaklan ti panangngaasim, O Apo; ikkannak iti biag a mayallubog iti hustisiam.

¹⁵⁷Adu dagiti kabusorko ken mangidadanes kaniak, ngem diak baybay-an dagiti lintegmo.

¹⁵⁸Marurodak a makakita kadagiti mangliliput, agsipud ta dida tungpalen dagiti bilinmo.

¹⁵⁹Kitaem kadi, O Apo, ti ayatko kadagiti pannursurom. Taginayonem ti biagko kas mayannurot iti di agbalbaliw nga ayatmo.

¹⁶⁰Naibatay ti lintegmo iti kinapudno, ket mataginayon ti amin a nalinteg a pangngeddengmo.

¹⁶¹Awan panggapuan dagiti agtuturay a mangidadanes kaniak ngem iti amin a pusok, pagraemak dagiti saom.

¹⁶²Maragsakanak gapu kadagiti karim, kaslaak la iti makasarak iti napateg a gameng.

¹⁶³Guraek ken laisek ti amin a kinaulbod, ngem ay-ayatek ti lintegmo.

¹⁶⁴Mamimpito iti inaldaw nga agdaydayawak kenka, gapu kadagiti nalinteg a pangngeddengmo.

¹⁶⁵Naan-anay ti talged dagiti agayat iti lintegmo. Awan ti makabalin a mangitibkol kadakuada.

¹⁶⁶Ur-urayek, O Apo, ti panangisalakanmo, ket tungpalek dagiti bilinmo.

¹⁶⁷Tungpalek dagiti ipaalagadmo; ay-ayatek ida iti amin a pusok.

¹⁶⁸Tungpalek dagiti bilbilin ken pannursurom; makitam dagiti amin nga aramidko.

¹⁶⁹Dumanon koma kenka ti asugko, O Apo! Ikkannak kadi iti pannakaawat kas inkarim.

¹⁷⁰Ipangagmo koma ti kararagko; isalakannak kadi kas inkarim.

¹⁷¹Kanayon a yebkasko ti pagdaydayawko kenka, gapu ta isursurom kaniak dagiti bilinmo.

¹⁷²Agkantaak iti maipapan iti lintegmo, gapu ta nalinteg dagiti bilinmo.

¹⁷³Madadaanka kadi a tumulong kaniak, ta tungtungpalek dagiti bilinmo.

¹⁷⁴Segseggaak, O Apo, ti panangisalakanmo! Pagragsakak ti lintegmo.

¹⁷⁵Ikkannak kadi iti biag tapno idaydayawka; masarakak koma ti tulong kadagiti pannursurom.

¹⁷⁶Nayaw-awanak a kasla napukaw a karnero, umaynak koma ngarud biroken nga adipenmo, ta diak nalipatan dagiti lintegmo.