Read Iloko Psalms 132 Bible Online

Psalms 132 - Iloko bible

Psalms 132

¹O Apo, lagipem kadi ni David, ken ti amin a sinagabana.

²Lagipem met, O Apo, ti inkarina, ti kari a sinapataanna kenka, a Mannakabalin a Dios ni Jacob:

³“Saanakto nga agawid wenno mapan iti iddak;

⁴saanak nga aginana, diak ikidem dagiti matak,

⁵agingga a maipaayak iti lugar ti Apo, iti pagnaedan ti Mannakabalin a Dios ni Jacob.”

⁶Iti Efrata, nadamagmi ti maipapan iti Lakasa ti Tulag, ket nasarakanmi kadagiti tantanap ti Jearim.

⁷Kinunami, “Intayo iti balay ti Apo, agdaydayawtayo iti sakaanan ti tronona!”

⁸Umayka iti Templo, O Apo, agraman ti Lakasa a simbolo ti bilegmo ket agyanka ditoy iti agnanayon awan inggana.

⁹Aramiden koma dagiti papadim ti rumbeng ken umno; agdir-i koma iti rag-o dagiti bukodmo a tattao.

¹⁰O Apo, nagkarika idi ken ni David nga adipenmo; dimo kadi laksiden ti pinilim nga ari.

¹¹Sinapataam ti karim ken ni David, ket saanmonto a paglikudan: “Isaadkonto nga ari ti maysa kadagiti annakmo, ket sumarunonto kenka nga agtugaw iti trono.

¹²No napudno dagiti annakmo iti tulagko ken dagiti ibilinko kadakuada, agarinto met a kas kenka iti agnanayon dagiti sumarsaruno a kaputotanda.”

¹³Pinili ni Yahweh ti Sion; kayatna a sadiay ti pagnaedanna:

¹⁴“Ditoyto ti pagyanak iti agnanayon; ditoyto ti kayatko a pagturayan.

¹⁵Itedkonto iti Sion ti amin a kasapulanna; ikkakto dagiti napanglaw nga agnaed kenkuana iti taraon agingga a mapnekda.

¹⁶Bendisionakto dagiti papadina iti amin nga aramidda; idir-into dagiti tattaona ti ragsakda.

¹⁷Ditoy, patuboekto ti maysa a sara nga agpaay ken ni David; nangisaganaak iti pagsilawan a maipaay iti pinilik.

¹⁸Lemmesekto iti bain dagiti kabusorna, ngem rumang-ayto ti pagarianna.”