Read Iloko Psalms 135 Bible Online

Psalms 135 - Iloko bible

Psalms 135

¹Madaydayaw ti Apo. Idaydayawyo ti nagan ti Apo, dakayo nga adipenna,

²dakayo nga agserserbi iti balayna, iti Templo ti Diostayo!

³Idaydayawyo ti Apo, ta isu ket managparabur. Kantaanyo ti naganna, ta isu ket manangngaasi.

⁴Pinilina ni Jacob nga agpaay kenkuana ken dagiti Israelita a kas kukuana.

⁵Ammok a naindaklan ti Apo, ket naturturay ngem dagiti amin a didiosen.

⁶Aramidenna ti aniaman a pagayatanna sadi langit ken ditoy daga, iti taaw wenno iti yuyeng.

⁷Manipud pungto ti daga, alaenna dagiti ulep a mangyeg bagio; parnuayenna ti kimat nga agpaay iti tudo, ket iruarna ti angin iti pagiduldulinanna.

⁸Pinatayna amin nga inauna nga annak idiay Egipto, annak man ti animal wenno tao.

⁹Sadiay, nakaskasdaaw dagiti inaramidna a pangdusana iti Faraon ken amin nga ofisialesna.

¹⁰Adu a pagilian ti rinebbekna ket nabibileg nga ari pinatayna ida:

¹¹Sihon nga ari dagiti Amorreo, Og nga ari ti Basan, ken amin nga ari ti Canaan.

¹²Intedna ti dagada kadagiti tattaona; wen, intedna dagitoy kadagiti Israelita.

¹³O Apo, agtalinaed nga agnanayon ti naganmo; malaglagipdakanto dagiti amin a kaputotan.

¹⁴Salaknibanto ni Yahweh dagiti tattaona, ket wayawayaannanto dagiti adipenna.

¹⁵Naaramid iti pirak ken balitok dagiti dios dagiti nasion, sinukog ida dagiti tattao.

¹⁶Adda ngiwatda, ngem dida makasao; adda matada, ngem dida makakita.

¹⁷Adda lapayagda, ngem dida makangngeg, ket awan anges nga aggapu iti ngiwatda.

¹⁸Sapay koma ta maipada kadagiti didiosen dagiti nagaramid ken amin nga agtalek kadakuada.

¹⁹Dakayo nga Israelita, idaydayawyo ti Apo. Idaydayawyo ti Apo, dakayo a papadi ti Dios!

²⁰Dakayo a Levita, itan-okyo ti Apo. Itan-okyo ti Apo, dakayo nga agdaydayaw kenkuana.

²¹Idaydayawyo ti Apo idiay Sion, idiay Jerusalem a pagnaedanna. Madaydayaw ti Apo!