Read Iloko Psalms 139 Bible Online

Psalms 139 - Iloko bible

Psalms 139

¹O Apo, inusignak ket ammonak.

²Ammom amin nga aramidko; ammom dagiti pampanunotko uray addaka iti adayo.

³Agtartrabahoak man wenno agin-inanaak, ammom amin a gunayko, makitanak.

⁴Uray sakbay nga agsaoak, ammomon ti innak ibalikas.

⁵Addaka latta iti lawlawko, ket salaknibannak iti pannakabalinmo.

⁶Diak matukod daytoy a pannakaammom kaniak; nauneg unay ket saanko a magaw-at.

⁷Sadino ti papanak tapno malisianka? Sadino ti pagkamangak tapno maadaywanka?

⁸No umuliak sadi langit, addaka met sadiay. No agiddaak iti lubong dagiti natay, masarakanka met sadiay.

⁹No agtayabak a mapan iti labes ti leleggakan ti init, wenno agnaedak iti ngarab ti taaw iti laud,

¹⁰addaka sadiay a mangiturong kaniak, ti kannawan nga imam kibinennak.

¹¹Mabalinko a dawaten iti sipnget nga ilemmengnak wenno agbalin a rabii ti lawag a manglikmut kaniak.

¹²Ngem uray ti sipnget saan a sipnget kenka, ket ti rabii naraniag a kas iti aldaw; ta agpada kenka ti sipnget ken lawag.

¹³Pinartuatmo ti amin a paset ti bagik, sinukognak iti tian ni inak.

¹⁴Idaydayawka, ta rumbeng a kabutengka; datdatlag ken nakaskasdaaw dagiti aramidmo. Ammok daytoy iti amin a pusok.

¹⁵Nakitam ti pannakabukel dagiti tulangko; naannad ti panagkakamangda iti tian ni inak, idi masuksukogak iti nalimed.

¹⁶Nakitanak sakbay a mayanakak. Dagiti naituding nga aldawko nailanadda amin iti librom, uray awan pay nangrugi kadakuada.

¹⁷Diak matukod dagiti pampanunotmo, O Dios; saan a mabilang ti kaaduda.

¹⁸Mabilangko kadi ida? Saan, ta ad-aduda ngem ti darat. No makariingak addaakto pay laeng kenka.

¹⁹O Dios, gudasem la koman dagiti managdakdakes! Panawandak la koman dagita a naranggas!

²⁰Padpadaksendaka dagitoy a tattao; agsaoda iti maibusor iti naganmo!

²¹O Apo, kagurak unay dagiti manggura kenka! Kasta unay ti pananglaisko kadagiti bumusor kenka!

²²Saan a maikkat ti gurak kadakuada; ibilangko a kabusorko ida.

²³Usigennak, O Dios, ket ammoem ti adda iti pusok. Suotennak tapno makitam ti adda iti panunotko.

²⁴Wen, sukimatem no adda kinadakes kaniak, ket iturongnak iti nagkauna a dana.