Read Iloko Psalms 14 Bible Online

Psalms 14 - Iloko bible

Psalms 14

¹“Awan Dios,” kuna ti maag iti pusona. Rinukerda amin ken makarimon dagiti aramidda; awan ti uray maysa nga agaramid iti naimbag.

²Tannawagan ti Apo ti sangkataoan manipud langit, ta kitaenna no adda maysa a masirib, kitaenna no adda agdaydayaw kenkuana.

³Ngem isuda amin naglabsingda, dakesda amin a padapada; awan naimbag nga aramidda, wen, awan uray maysa.

⁴“Saanda kadi nga ammo?” salsaludsoden ti Apo. “Awan kadi ammo dagitoy dakes a tattao? Taktakawenda kadagiti tattaok ti pagbiagda, ket saan a siak ti pagkararaganda.”

⁵Ngem napalalonto ti panagbutengda ta adda ti Dios kadagiti agtulnog kenkuana.

⁶Lapdanda ti plano ti marigrigat, ngem ti Apo ti salaknibna.

⁷Anian a panangikararagko a manipud Sion dumteng ti pannakaisalakan ti Israel. Anian a ragsakto dagiti Israelita inton parang-ayen manen ti Apo ida.