Read Iloko Psalms 140 Bible Online

Psalms 140 - Iloko bible

Psalms 140

¹Isalakannak kadi, kadagiti managdakdakes, O Apo. Salaknibannak kadagiti naranggas a tattao.

²Kanayon a dakes ti panggepda, ket kanayon a mangirugida iti riri.

³Kasla makapatay nga uleg dagiti dilada, kasla gita ti karasaen dagiti saoda.

⁴Salaknibannak kadi, iti ima ti nadangkes, O Apo. Ilisinak kadagiti naranggas a tattao nga agpanggep iti pannakadadaelko.

⁵Nangipakat dagiti natangsit iti pakaipalab-ogak. Nangibatengda iti naiket a tali, ket iti dana, nangikabilda iti paggugubatan.

⁶Kunak ken ni Yahweh, “Sika ti Diosko.” Ipangagmo kadi, O Apo, ti panagdawatko iti tulong.

⁷O Apok a Kangatoan, sika a nabileg a Mannubbotko, sinalaknibannak tapno diak maan-ano.

⁸O Apo, dimo patgan ti kalikagum dagiti managdakdakes. Dimo pagballigien dagiti dakes a panggepda.

⁹Dimo pagballigien dagiti kabusorko; idissuormo met laeng kadakuada dagiti pammutbutengda kaniak.

¹⁰Agtinnag koma kadakuada dagiti umap-apuy a beggang. Maitappuakda koma iti abut ket dida makaruaren.

¹¹Saan koma nga agballigi dagiti mamadpadakes. Ti kinadakes dagus koma a tiliwenna ti naranggas a tao ket dadaelenna.

¹²Ammok, O Apo, nga ikaluyam dagiti mairurumen, ket ikalintegam dagiti napanglaw.

¹³Kinapudnona, idaydayawdakanto dagiti nalinteg; agtaengdanto iti imatangmo.