Read Iloko Psalms 141 Bible Online

Psalms 141 - Iloko bible

Psalms 141

¹Umawagak kenka, O Apo; darasem kadi ti tumulong kaniak. Denggennak kadi no umawagak kenka.

²Awatem koma kadi toy kararagko a kas maysa nga insenso ken toy sitatag-ay nga imak a kas maysa a daton iti rabii.

³Paguardiaam kadi, O Apo, ti ngiwatko, ket paaywanam ti ruangan dagiti bibigko.

⁴Ilisinak kadi iti tarigagay nga agaramid iti dakes, wenno makikadua kadagiti tattao nga agaramid iti kinakillo. Diakto koma dumar-ay kadagiti fiestada.

⁵Mabalinnak a dusaen ken babalawen a sikakaasi ti naimbag a tao, ngem diak itulok a lanaan ti managdakdakes ti ulok, ta kanayon nga ikarkararagko ti maibusor kadagiti dakes nga aramidna.

⁶Inton maitinnag dagiti turayenda manipud kadagiti rangkis awatento dagiti tattao a pudno dagiti innak insao.

⁷Kas iti kayo a mabalbalsig ken masigsigit, kasta koma a maiwarawara dagiti tulangda iti ngarab ti tanem.

⁸Ngem siak, O Apok a Kangatoan, agtalekak latta kenka. Birokek ti panangsalaknibmo; dimo kadi ipalubos a matayak.

⁹Ilisinak kadi kadagiti impakatda a pangsilo kaniak; wen, kadagiti palab-og dagiti managdakdakes.

¹⁰Sapay koma ta matnag dagiti managdakdakes iti mismo a palab-ogda, idinto a saanak a maan-ano.