Read Iloko Psalms 143 Bible Online

Psalms 143 - Iloko bible

Psalms 143

¹Denggem, O Apo, ti kararagko; ipangagmo toy asugko. Nalinteg ken mapagtalkanka; patgam ngarud ti dawatko kenka.

²Dinak kadi ukomen nga adipenmo; awan ti saan a nagbasol iti imatangmo.

³Sinarsaraknak ti kabusorko, ket namimpinsan a pinarmeknak. Iti nasipnget a pagbaludan, impisoknak, ket awan dumak kadagiti natay idi un-unana.

⁴Isut' gapuna a ti anusko awanen, ket ti namnamak napukawen.

⁵Malagipko dagiti naglabas nga aldaw, ut-utobek dagiti amin nga inaramidmo, ket dagiti amin a gapuanam adda iti panunotko.

⁶Ingatok dagiti imak nga agkararag kenka kasla natikag a daga toy kararuak a mawaw kenka.

⁷O Apo, inka kadin ipangag ti dawatko; ti amin a namnamak napukawko. Dinak kadi ilemmengan amangan no maipadaak kadagiti bumaba iti lubong dagiti natay.

⁸Agtalekak kenka; binigat nga ipalagipmo kaniak ti di agbalbaliw nga ayatmo. Dumanon kenka dagiti kararagko; isurom kadi kaniak ti rumbeng a dalanko.

⁹Kenka, O Apo, kumamangak, pangngaasim kadi ta salaknibannak; ispalennak iti ima dagiti kabusorko.

¹⁰Sika ti Diosko; isuronak a mangaramid iti pagayatam. Naimbagka koma kaniak, ket iturongnak iti natalged a dalan.

¹¹Kas inkarim, O Apo, isalakannak; gapu iti kinaimbagmo, ispalennak kadagiti pakariribukak.

¹²Gapu ta ay-ayatennak, patayem dagiti kabusorko; pukawem dagiti mangparparigat kaniak ta siak ti adipenmo.