Read Iloko Psalms 145 Bible Online

Psalms 145 - Iloko bible

Psalms 145

¹O Diosko ken Arik, ipakaammok a naindaklanka; agyamanak kenka iti agnanayon awan inggana.

²Inaldawto nga agyamanak kenka; idaydayawkanto iti agnanayon nga awan inggana.

³Naindaklan ti Apo, ket maikari a naindaklan ti pannakaidaydayawna; saan a matukod ti kinatan-okna.

⁴Maidaydayawto dagiti aramidmo iti tunggal kaputotan; ipakaammodanto dagiti gapuanam a naindaklan.

⁵Masarsaritanto ti dayag ken daegmo, ket ut-utobekto dagiti nakaskasdaaw nga aramidmo.

⁶Ipakdaar dagiti tattao dagiti nakaskasdaaw nga aramidmo, ket ipakaammokto ti kinaindaklanmo.

⁷Saritaendanto ti amin a kinaimbagmo; ikantadanto ti kinamanangngaasim.

⁸Managparabur ken manangngaasi ti Apo. Saan a nalaka nga agpungtot, ket di met maibus ti kinamanagayatna.

⁹Naimbag ti Apo iti tunggal maysa, ket nadungngo kadagiti amin a pinarsuana.

¹⁰Idaydayawdaka dagiti amin a parsuam, O Apo, ket agyaman kenka dagiti bukodmo a tattao.

¹¹Ti dayag ti pagariam ti sawenda, ket ti bilegmo ti saritaenda,

¹²tapno maammoan ti tunggal maysa ti naindaklan nga aramidmo ken ti kinadaeg ti pagariam.

¹³Agnanayon ti panagarim; agpaut ti panagturaymo iti amin a kaputotan. Tungpalen ti Apo ti amin a karina; manangngaasi iti amin nga aramidna.

¹⁴Tulonganna dagiti adda parikutna ket dagiti naidasay, bangonenna.

¹⁵Mangnamnama kenka ti amin a parsua, ket ikkam ida iti kanen no masapulda.

¹⁶Mangtedka a sibubuslon kadakuada, ket itedmo ti kasapulan ti tunggal maysa.

¹⁷Nalinteg ti Apo iti amin a dalanna ken naasi iti amin nga aramidna.

¹⁸Asideg ti Apo kadagiti amin nga umawag kenkuana; wen, kadagiti napudno nga agdawat iti tulongna.

¹⁹Itedna ti kasapulan dagiti agraem kenkuana; denggenna ti asugda, ket isalakanna ida.

²⁰Salaknibanna dagiti amin nga agayat kenkuana, ngem dagiti amin a managdakdakes, dadaelenna.

²¹Kanayonto nga idaydayawko ti Apo; itan-ok koma ti amin a parsua ti nasantoan a naganna iti agnanayon nga awan inggana.