Read Iloko Psalms 147 Bible Online

Psalms 147 - Iloko bible

Psalms 147

¹Madaydayaw ti Apo! Nasayaat a kantaen ti pagdayaw iti Diostayo! Nasayaat ken rumbeng ti mangidaydayaw kenkuana!

²Bangonen manen ti Apo ti Jerusalem; isublina dagiti naitalaw a tattaona.

³Dagiti naupay, paragsakenna, ket bedbedanna dagiti sugatda.

⁴Dagiti bituen, intudingna ti bilangda, ket awaganna ti tunggal maysa iti naganda.

⁵Naindaklan ken mannakabalin ti Apotayo; saan a matukod ti kinasiribna.

⁶Itan-okna ti napakumbaba, ngem ti managdakdakes, ibaddekna.

⁷Agkantakayo iti panagyaman iti Apo. Agarpakayo nga agdaydayaw iti Diostayo.

⁸Kumotanna ti tangatang iti ulep; itedna ti tudo nga agpaay iti daga, ket pagtuboenna ti ruot kadagiti turod.

⁹Ikkanna dagiti animal iti kanenda ken dagiti sibong ti wak no umarikiakda.

¹⁰Saan a maay-ayo iti napigsa a kabalio; awan serserbi kenkuana ti tured ti soldado.

¹¹Ngem maay-ayo kadagiti agbuteng kenkuana, kadagiti agtalek iti napudno nga ayatna.

¹²O Jerusalem, agdaydayawka iti Apo. O Sion, agdaydayawka iti Diosmo.

¹³Palagdaenna dagiti ruangan ti balaymo, ket bendisionanna dagiti tattaom.

¹⁴Pagtalinaedenna ti kappia kadagiti beddengmo ket pennekennaka iti kasayaatan a trigo a paraburna.

¹⁵Bilinenna ti daga ket napardas a matungpal ti saona.

¹⁶Yaplogna ti niebe a kas iti ules, iwarasna iti yelo a kas iti tapok.

¹⁷Kasla bato ti yelo a pagtinnagenna; awan ti makaibtur iti lam-ek a yegna.

¹⁸Marunaw ti yelo no agbilin, ket agayus ti danum no yegna ti angin.

¹⁹Ipakaammona ti saona ken ni Jacob, dagiti alagaden ken paglinteganna iti Israel.

²⁰Saanna nga inaramid daytoy kadagiti sabali a pagilian, saanna nga ipakaammo kadakuada dagiti lintegna. Madaydayaw ti Apo!