Read Iloko Psalms 16 Bible Online

Psalms 16 - Iloko bible

Psalms 16

¹Salaknibannak, O Dios, ta sika ti pagkamangak.

²Kunak iti Apo, “Sika ti Apok; naggapu kenka ti amin a naimbag nga adda kaniak.”

³Nagimbag ketdin dagiti mapagtalkan a tattao ti Apo! Pagragsakak unay ti pannakikaduak kadakuada.

⁴Dagiti agkamang kadagiti sabali a dios, paaduenda laeng ti parikutda. Diakto kumuyog kadagiti panagidatonda wenno agdaydayaw kadagiti didiosenda.

⁵Sika laeng, O Apo, ti adda kaniak, ket itedmo amin ti kasapulak; adda kadagita imam ti masakbayak.

⁶Nakaskasdaaw dagiti sagutmo kaniak; pasigda amin a nakasaysayaat.

⁷Idaydayawko ti Apo ta idaldalannak; iti rabii patigmaanannak ti konsensiak.

⁸Kanayon a mariknak ti kaadda ti Apo, asideg ket awan ti pakaan-anoak.

⁹Ngarud, napnoanak iti rag-o ken ragsak ket kanayon a natalged ti riknak.

¹⁰Ngamin, iti bileg ni patay salaknibannak, ket iti lubong dagiti natay, dimo bay-an nga agrupsa ti ay-ayatem.

¹¹Isurom kaniak ti dalan nga agturong iti biag; ti kaaddam kaniak, punnoennak iti rag-o, ket ikkannak iti agnanayon a ragsak.