Read Iloko Psalms 17 Bible Online

Psalms 17 - Iloko bible

Psalms 17

¹Denggem, O Apo, ti asugko a mangtunton iti kalintegak; ti panagdawatko iti tulong imdengannak. Ipangagmo daytoy napudno a kararag.

²Ipaulogmo ti pangngeddengmo a manganamong kaniak agsipud ta ammom ti naimbag.

³Naan-anay nga ammom ti pusok; umayka kaniak iti rabii. Naan-anay ti panangsuotmo kaniak, ket awan nasarakam a dakes a tarigagayko. Pudno ti saok, saan a kas kadagiti dadduma; tinungpalko dagiti bilinmo ken diak sinurot ti dalan dagiti naranggas.

⁵Kankanayon a sinurotko ti wagasmo, ket pulos a diak pinanawan ti dalanmo.

⁶Agkararagak kenka, O Dios, agsipud ta sungbatannak; taliawennak ngarud ket dagiti saok inka ipangag.

⁷Ipakitam ti nakaskasdaaw nga ayatmo ket ispalennak; iti sibaymo, kadagiti kabusor awan pakaan-anoak.

⁸Salaknibannak, kas panangsalluadmo iti ay-ayatem; salukobannak kadagiti bukodmo a payak

⁹iti panangdarup dagiti managdakdakes a kabusor a nanglikmut kaniak.

¹⁰Awan asida ket natangsit ti panagsaoda.

¹¹Addada iti sadinoman a pagturongak; agur-urayda iti gundaway a mangipababa kaniak.

¹²Kasda la leon a mangur-uray kaniak tapno rangrangkayendak.

¹³Umayka, O Apo, ket parmekem dagiti kabusorko! Isalakannak kadagiti managdakdakes babaen iti kampilanmo.

¹⁴Isalakannak kadagiti addaan iti amin a kasapulan ditoy a biag. Ipataymo kadakuada dagiti panagsagaba nga insaganam kadakuada, ket adda pay koma agpaay nga ibaklay dagiti appokoda.

¹⁵Ngem makitakanto gapu ta awan dakes nga aramidko; ket gapu iti kaaddam, no makariingak mapnoakto iti rag-o.