Read Iloko Psalms 19 Bible Online

Psalms 19 - Iloko bible

Psalms 19

¹Nabatad nga ipakita ti langit ti dayag ti Dios! Nalawag nga ipakaammo ti tangatang ti inaramidna!

²Tunggal aldaw ipakaammona iti sumaruno nga aldaw; tunggal rabii ibagana iti sumaruno a rabii.

³Awan maaramat a sao wenno bitla, awan met timek a mangngeg.

⁴Nupay kasta, iti entero a lubong agsaknap ti mensaheda, makadanon ti saoda kadagiti pungto ti daga. Nangikabil ti Dios sadi langit iti tolda a pagyanan ti init.

⁵Rummuar iti bigat, kas iti lalaki nga agkasar, kas tumataray a siraragsak a makilumba.

⁶Iti maysa a pungto ti langit ti taudanna, ket agrikos agingga iti sabali a pungtona. Awan ti makalisi iti pudotna.

⁷Ti linteg ti Apo awan pagkuranganna; baro a pigsa ti itedna. Pudno ti pammaneknek ti Apo, pagsiribenna uray dagiti nanumo.

⁸Nalinteg dagiti alagaden nga intuyang ti Apo, maragsakan dagiti agtulnog kadakuada. Nainkalintegan dagiti bilbilinna, ket iti isip pannakaawat ti itedna.

⁹Nasayaat ti panagdayaw iti Apo, agpaut nga agnanayon. Nalinteg dagiti pangngeddengna, ket kanayon nga awan idumdumada.

¹⁰Ad-addada a matarigagayan ngem iti kasayaatan a balitok, nasamsam-itda ngem ti puro a diro.

¹¹Isuda ti mamagbaga kaniak nga adipenmo; no tungpalek ida, magunggonaanakto.

¹²Saan a madlaw ti tao ti bukodna a biddut; isalakannak ngarud kadagiti diak makita a babakko.

¹³Yadayonak met kadagiti agdadata a basolko; dimo koma ipalubos nga iturayandak. Iti kasta, awanton ti pakapilawak, ket iti nakaro a basol mawayawayaanak.

¹⁴Sapay koma ta maragsakanka kadagitoy balikas ken panagpampanunotko, O Apo a kamang ken mannubbotko.