Read Iloko Psalms 21 Bible Online

Psalms 21 - Iloko bible

Psalms 21

¹O Apo, naragsakan ti ari gapu ta pinapigsam; napalalo ti rag-ona gapu ta pinagballigim.

²Intedmo ti tinarigagayanna, ket impangagmo ti dawatna.

³Sinaraboam kadagiti naindaklan a bendision, ket binalangatam iti korona a balitok.

⁴Nagkiddaw iti biag ket intedmo kenkuana, biag a napaut nga awan inggana.

⁵Dakkel ti dayagna gapu iti panangtulongmo; dayaw ken tan-ok kenkuana ti intedmo.

⁶Kanayon nga adda kenkuana ti bendisionmo, ket ti kaaddam ti mangpunno kenkuana iti rag-o.

⁷Agtalek ti ari ken ni Yahweh a Kangatoan; gapu iti di agbalbaliw nga ayat ni Yahweh kanayonto a natalged, di maan-ano.

⁸Tiliwento ti ari dagiti amin a kabusorna; tiliwennanto dagiti amin a gumurgura kenkuana.

⁹Inton agparang, dadaelennanto ida kas iti gumilgil-ayab nga apuy. Alun-onento ida ni Yahweh iti pungtotna, ket apuyto ti mangikisap kadakuada.

¹⁰Awanto ti makalasat kadagiti kaputotanda; ikisapmonto ida a sangapada.

¹¹Agplanoda iti dakes, ket agtutulagda iti maibusor kenkuana, ngem didanto agballigi.

¹²Agtataraydanto inton panaenna ida.

¹³Maitan-okka, O Apo, iti bukodmo a pigsa! Ikanta ken idaydayawmi ti pannakabalinmo.