Read Iloko Psalms 22 Bible Online

Psalms 22 - Iloko bible

Psalms 22

¹Diosko, Diosko, apay a binaybay-annak? Immasugak kenka tapno tulongannak, ngem awan latta ti pannaranaymo.

²Iti aldaw umawagak kenka, Diosko, ngem saamla a sumungbat, ken iti rabii, ngem awan inanak.

³Ngem sika ti Nasantoan, naisaad iti trono nga itantan-ok ti Israel.

⁴Sika ti nangitalkan dagiti ammami iti namnamada; wen, nagtalekda kenka ket insalakanmo ida.

⁵Immawagda kenka ket ti peggad nalisianda; nagtalekda kenka ket saanmo a pinaay ida.

⁶Ngem arigko iti igges, saan a tao, lalaisen ken uy-uyawen dagiti tattao.

⁷Amin a makakita kaniak, pagang-angawandak; guyguyaban ken wingwingiwingandak.

⁸Kunada, “Nagtalekka iti Apo. Apay a dinaka isalakan? No ayatennaka ti Apo, apay a dinaka tulongan?”

⁹Sika ti nangipaay iti talged iti pannakaipasngayko, inaywanannak idi maladagaak pay nga agsussuso.

¹⁰Nagtalekak kenka manipud pannakayanakko; sikan ti Diosko manipud pay pannakaipasngayko.

¹¹Dinak adaywan ta agpeggadak, ket awan tumulong kaniak.

¹²Adda dagiti kabusor iti lawlawko, kasda la atap nga arban ti baka. Nalikmutak kadagiti narungsot a toro iti Basan.

¹³Ungapenda dagiti ngiwatda kaniak; arigda ti ngumerngernger a leon a sigagagar a mangalun-on.

¹⁴Naibusen ti amin a pigsak, kasla danum a naibuyat. Agkutukoten amin a tultulangko, toy pusok kasla allid a marunaw iti unegko.

¹⁵Namaga a kas tapok ti ngiwatko, ket dumket ti dilak iti ngadasko. Binaybay-annakon a matay iti tapok a nakapasagak.

¹⁶Ti bunggoy dagiti managdakdakes lawlawendak; kasda la pangen ti aso a mangalikubkob kaniak, lasanglasangenda dagiti ima ken saksakak.

¹⁷Agparangen dagiti amin a tulangko, mulmulagatannak dagiti kabusorko;

¹⁸Pagsusugalanda dagiti pagan-anayko, pagbibinnunotanda ti kagayko.

¹⁹O Apo, saannak kadi a panawan! Umaynak ispalen, darasennak a tulongan.

²⁰Iti kampilan, toy kararuak isalakanmo; kadagitoy nga aso ispalem toy biagko.

²¹Iti ngiwat dagitoy a leon isalakannak; awan gawayko kadagitoy a toro nga atap.

²²Saritaekto kadagiti kailiak ti naganmo; kadagiti kongregasion idaydayawkanto:

²³“Dakayo nga adipen ti Apo, agdaydayawkayo kenkuana; dakay a kaputotan ni Jacob, itan-okyo; dakay a tattao iti Israel, agrukbabkayo kenkuana.

²⁴Dina lipaten dagiti napanglaw, wenno baybay-an ida nga agsagaba; saanna met nga adaywan ida, ngem sungbatanna no agpatulongda kenkuana.”

²⁵Iti dakkel a gimong, saritaekto dagiti inaramidmo; iti imatang dagiti amin a natulnog kenka, iruknoykonto ti inkarik a daton.

²⁶Manganto koma dagiti napanglaw agingga a mapnekda; agdaydayawto iti Apo dagiti mangbirok kenkuana. Rumang-ayda koma iti awan inggana!

²⁷Lagipendakanto ti tunggal maysa ditoy daga, Apo; manipud iti amin a suli ti lubong umaydanto agkamang kenka ket agrukbabda.

²⁸Ni Yahweh, isu ti Ari, ket iturayanna dagiti amin a nasion.

²⁹Kenkuana, dagiti natangsit agtameddanto; kenkuana, dagiti amin a tao agruknoyto, isuda amin nga aggibus ken patay.

³⁰Agserbinto kenkuana dagiti sumarsaruno a kaputotan; ipakaammodanto ni Yahweh iti masakbayan a kaputotan.

³¹Maibaganto kadagiti saan pay a nayanak, “Insalakan ti Apo dagiti tattaona.”