Read Iloko Psalms 25 Bible Online

Psalms 25 - Iloko bible

Psalms 25

¹Idatonko kenka, O Apo, ti kararagko.

²Agtalekak kenka, Diosko: dimo ipalubos a maparmekak ket maibabainak; dimo ipalubos a dagiti kabusorko laisendak!

³Saan a maparmek dagiti agtalek kenka, ngem maibabain dagiti mangbusor kenka.

⁴Isurom kaniak dagiti daldalanmo, O Apo; wen, ipakaammom ida kaniak.

⁵Isuronak nga agbiag kas mayannurot iti kinapudnom; ta sika ti Dios a mangisalakan kaniak. Agmalmalem nga agpannurayak kenka.

⁶O Apo, lagipem ti kinamanangngaasim ken kinamanagayatmo nga idi punganay a naipakaammo.

⁷Pakawanem ti basol ken labsingko idi agtutuboak; gapu iti di agbalbaliw nga ayat ken kinaimbagmo, O Apo, lagipennak!

⁸Nalinteg ken naimbag ni Yahweh; isurona dagiti managbasol iti rumbeng a pagnaanda.

⁹Iturongna dagiti napakumbaba iti nalinteg a dalan, ket isurona ida iti pagayatanna.

¹⁰Iti ayat ken kinapudno idalanna ida, dagiti amin a mangannurot iti tulag ken bilbilinna.

¹¹Tungpalem ti karim, O Apo, pakawanem dagiti basolko ta aduda.

¹²Dagiti agtulnog ken ni Yahweh, maammoandanto kenkuana ti rumbeng a dalan a surotenda.

¹³Narang-aydanto latta, ket tawidento dagiti annakda ti daga.

¹⁴Gagayyem ni Yahweh dagiti agtulnog kenkuana, ket patalgedanna kadakuada ti tulagna.

¹⁵Kanayon nga agpatulongak iti Apo, ta ispalennak iti amin a peggad.

¹⁶Taliawennak, O Apo, ket kaasiannak, ta agmaymaysaak ken nakapuyak.

¹⁷Ikkatem dagiti amin a pakariribukak, ket aonennak iti amin a pakarigatak.

¹⁸Imatangam dagiti amin a ladingit ken sagabaek, ket pakawanem dagiti amin a basolko.

¹⁹Kitaem ti kaadu dagiti kabusorko; kitaem no kasano ti pananggurada kaniak!

²⁰Salaknibannak ket isalakannak; dimo ipalubos a maparmekak, agsipud ta kenka, agkamangak.

²¹Ti kinaimbag ken kinalinteg aywanandak koma, agsipud ta agtalekak kenka.

²²Subbotem, O Dios, dagiti tattaom nga Israelita kadagiti amin a pakariribukanda.