Read Iloko Psalms 27 Bible Online

Psalms 27 - Iloko bible

Psalms 27

¹Ti Apo ti silaw ken salakanko; siasino ti kabutengko? Ti Apo ti sarikedked ti biagko; siasino ti kaamakko?

²No darupendak dagiti managdakdakes tapno patayendak, dagiti kabusorko ti maitibkol ken mapasag.

³Uray no lawlawennak ti entero nga armada, saanak nga agbuteng. Uray no darupendak, agtalekak latta kenkuana.

⁴Adda dinawatko iti Apo, daytoy laeng ti kalikagumko: agnaedak koma iti balayna iti unos ti panagbiagko, tapno mabuyak ti dayagna ken kiddawek ti panangidalanna.

⁵Iti tiempo ti riribuk linongannak; ilemmengnak iti Templona, iti Templona nga awan pakaan-anoak ket iti nangato a bato kitaenna a natalgedak.

⁶Iti kasta, parmekekto dagiti kabusorko a nanglikmut kaniak; iti Templona, agdatonakto a siraragsak. Agkantaakto, agdaydayawakto ken ni Yahweh.

⁷Denggennak kadi, O Apo, no umawagak kenka, ipangagnak koma ket mangngaasika!

⁸Idi kinunam, “Umaykayo kaniak,” insungbatko, “Umayak, O Apo.”

⁹Saanak koma nga ilemmengan! Saannak koma a kapungtot; dimo kadi papanawen ti adipenmo. Sika ti tumulong kaniak; dinak panawan, dinak baybay-an, O Dios a salakanko.

¹⁰Nalabit a baybay-andak dagiti dadakkelko, ngem aywanannak ti Apo.

¹¹Isuronak iti kayatmo nga aramidek, O Apo, ket iturongnak iti natalged a dalan, agsipud ta adu dagiti kabusorko.

¹²Kadagiti kabusorko dinak kadi yawat, padpadaksen ken butbutngendak.

¹³Mamatiak a bayat ti panagbiagko makitakto ti kinaimbag ti Apo kadagiti tattaona.

¹⁴Agtalekka iti Apo: Mamatika ket dimo pukawen ti namnamam. Wen, agtalekka iti Apo!