Read Iloko Psalms 30 Bible Online

Psalms 30 - Iloko bible

Psalms 30

¹Idaydayawka, O Apo, gapu ta insalakannak, ket dimo impalubos nga agragsak dagiti kabusorko.

²O Apo a Diosko, immasugak a tulongannak ket sika, pinaimbagnak.

³O Apo, manipud iti tanem inaonnak; naikuyogak kadagiti mapan iti mangliwengliweng nga abut iti baba ngem insublim daytoy biagko.

⁴Ikantayo ti pagdaydayaw iti Apo, dakay a mapagtalkan a tattaona! Lagipenyo dagiti inaramid ti Nasantoan, ket agyamankayo kenkuana!

⁵Apagdarikmat laeng ti pungtotna; ngem saan nga agpatingga ti kinaimbagna. Mabalin nga iti rabii adda sangsangit, ngem iti bigat, ragsak ti sumukat.

⁶Nariknak ti talged ket kinunak iti nakemko, “Pulos nga awan pakaan-anoak.”

⁷Nagsayaatkan, O Apo, impasdeknak a kas iti bantay a di magunggon. Ngem idi inlingedmo ta rupam kaniak, ti buteng linapunosnak.

⁸Kenka, O Apo, immawagak; nagpakpakaasiak a tulongannak:

⁹“Ania ti magun-odmo iti ipapatayko? Ania ti imbag a magun-od iti pannakaitanemko? Maidaydayawdaka kadi dagiti natay? Maiwaragawagda aya ti imbagmo a di agsarday?

¹⁰Denggennak, O Apo, ket kaasiannak! O Apo, tulongannak.”

¹¹Pinagbalinmo a rag-o ti dung-awko; inikkatmo ti panesko, ket kinawesannak iti ragsak.

¹²Iti kasta, saanakto nga agulimek, dagitinto pagdayawko kenka ti kankantaek. Sika, O Apo, ti Diosko; agnanayon a sika ti pagyamanak.