Read Iloko Psalms 31 Bible Online

Psalms 31 - Iloko bible

Psalms 31

¹O Apo, umayak kenka tapno salaknibannak, dimo kad ipalubos a maibabainak; nalintegka a Dios, ispalennak koma.

²Denggennak ket dika agtaktak a mangisalakan kaniak. Sika koma ti kamangko ket ikanawanak. Sika koma ti salingedko ket ispalennak.

³Sika ti bato a pagkamangak ken sarikedkedko, kas inkarim, tarabayen ken idalannak.

⁴Ilisinak iti silo a naisagana a pakatnagak; pagsalinongak agsipud ta adda peggad.

⁵Kadagita imam, italekko toy kararuak. Sikanto, O Apo, ti mangisalakan kaniak; ta Dioska a mapagtalkan.

⁶Guraem dagiti agdayaw kadagiti didiosen, ngem sika ti innak pagtalkan.

⁷Agrag-o ken agragsakakto, gapu iti di agbalbaliw nga ayatmo. Makitam amin a pakarigatak; ammom met ti pakariribukak.

⁸Dimo impalubos a parmekendak dagiti kabusorko; inikkannak iti wayawaya a mapan iti kaykayatko.

⁹O Apo, kaasiannak, ta adda pakariribukak. Iti kasasangitko napaksuyanen dagiti matak, agraman bagi ken kararuak.

¹⁰Immababan ti biagko; gapu iti ladingit ken sangsangitko. Gapu kadagiti pakasikorak, nakapsutakon, marunot pay dagiti tultulangkon.

¹¹Amin a kabusorko pagang-angawandak; karimondak dagiti kaarrubak. Kabutengdak dagiti makaam-ammo kaniak; no makitadak iti kalsada, itarayandak.

¹²Nalipatandakon a kaslaak la natayen; kaslaak la maysa a nabuong a banga.

¹³Mangngegko ti arasaas dagiti adu a kabusorko; buteng ti adda iti amin a lawlawko. Agtutulagda a mangpatay kaniak.

¹⁴Ngem agtalekak kenka, O Apo, ket kunak, “Sika ti Diosko.”

¹⁵Addaak a kanayon iti aywanmo; kadagiti mangidadanes kaniak ken kadagiti kabusorko, isalakannak.

¹⁶Kaasiam kadi toy adipenmo; isalakannak gapu iti di agbalbaliw nga ayatmo.

¹⁷Kenka, O Apo, umawagak; dimo kadi ipalubos a maibabainak. Ipababam dagiti managdakdakes agingga nga agiddada iti tanemda nga awan arimekmekda.

¹⁸Pagulimekem dagiti natangsit ken ulbod! Pasardengem dagita napalangguad a manglalais kadagiti nalinteg a tattao.

¹⁹Bendision ti insaganam kadagiti agbuteng kenka, nakaskasdaaw dagiti imbag nga ipaaymo kadakuada. Ammo ti amin ti kinaimbagmo, kadagiti agtalek kenka, natalged ti salaknibmo.

²⁰Iti kaaddam, salinongam ida nga awan pakaan-anoanda. iti panangisikat dagiti tattao kadakuada. Iti natalimeng a lugar, yadayom ida iti pammarpardaya dagiti kabusorda.

²¹Madaydayaw ti Apo! Nakaskasdaaw ti ayat nga impaayna kaniak idi linakub ken dinarupdak.

²²Kinunak gapu iti butengko, “Nayadayoakon iti imatangmo.” Nupay kasta, impangagmo ti ikkisko idi dimmawatak iti tulongmo.

²³Ayatenyo ti Apo, dakay amin a matalek a tattaona! Dagiti mapagtalkan, salakniban ti Apo, ngem dagiti natangsit nakaro ti panangdusana kadakuada.

²⁴Kumiredkayo ket paturedenyo ti nakemyo, dakay amin a mangnamnama iti Apo.