Read Iloko Psalms 32 Bible Online

Psalms 32 - Iloko bible

Psalms 32

¹Nagasat ti tao a napakawan dagiti basolna ken napunas dagiti salungasingna.

²Nagasat ti tao nga awan ti ipabasol ni Yahweh kenkuana, ket awan kinasikap a masarakan iti pusona.

³Idi diak impudno dagiti basbasolko, nautoyanak iti agmalmalem a panagas-asugko.

⁴Aldaw ken rabii a dinusdusanak; napukaw a namimpinsan ti pigsak, kas panagpukaw ti linnaaw iti kalgaw.

⁵Impudnok kenka dagiti basolko; diak inlimed dagiti labsingko. “Inkeddengko nga ipudno kenka dagiti basbasolko,” kinunak, ket pinakawanmo dagiti amin a salungasingko.

⁶Ngarud, dagiti nalinteg a tattao, agkararagda koma kenka iti tiempo ti karigatna; no umay ti dakkel a layus ti riribuk, dinto dumanon kadakuada.

⁷Sika ti pagkamangak; iti riribuk, salaknibannak. Ipigsak nga ikanta ti panangisalakanmo agsipud ta addaak iti panangaywanmo.

⁸Kuna ni Yahweh, “Idalanka iti rumbeng a pagnaam; isuroka ken inka balakadan.

⁹Dika agbalin a nengneng a kas iti kabalio wenno mulo, a maikkan iti rienda tapno maiturong ti tao.”

¹⁰Dagiti nadangkes adu ti sagsagabaenda, ngem dagiti agtalek iti Apo, sallukoban ti di agbalbaliw nga ayatna.

¹¹Dakayo a nalinteg a tattao, agrag-okayo iti Apo! Wen, agragsakkayo gapu iti inaramidna! Agriawkayo iti ragsak, dakay amin a naimbag ti panagpuspusona.