Read Iloko Psalms 33 Bible Online

Psalms 33 - Iloko bible

Psalms 33

¹Dakay amin a nalinteg, agragsakkayo gapu iti inaramid ti Apo. Dakayo a natulnog kenkuana, agdaydayawkayo.

²Buyoganyo iti lira ti panagyamanyo; danggayanyo dagiti kantayo kadagiti arpa a sangapulot' kuerdasna.

³Baro a kanta ti ikantayo kenkuana; tokarenyo a silalaing ti arpa, ket agriawkayo iti rag-o.

⁴Pudno dagiti sao ni Yahweh; mapagtalkan dagiti amin nga aramidna.

⁵Ayatenna ti kinalinteg ken hustisia; napno ti daga iti di agbalbaliw nga ayatna.

⁶Babaen iti bilin ti Apo, naparsua dagiti langit; babaen iti saona, naparsua ti init, ti bulan, ken dagiti bituen.

⁷Pinagtitiponna amin a danum ti baybay iti maymaysa a lugar; insaadna dagiti mangliwengliweng a taaw kadagiti pagidulinan.

⁸Agbutengkayo iti Apo, dakay amin a daga! Dakay amin a tattao ti lubong, agbutengkayo kenkuana!

⁹Naaramid ti lubong babaen iti panagsaona; timmaud ti amin babaen iti panagbilinna.

¹⁰Dagiti gandat dagiti nasion dadaelen ni Yahweh; ti panggep dagiti tattao, paayenna.

¹¹Ngem agtalinaed nga agnanayon ti planona, ti panggepna agpaut nga awan inggana.

¹²Naragsak ti nasion a ti Apo ti Diosna; naragsak dagiti pinilina nga agpaay kenkuana!

¹³Manipud langit, ti Apo tumannawag, ket makitana ti sangkataoan.

¹⁴Manipud pagturayanna, tannawaganna amin nga agtaeng ditoy daga.

¹⁵Binukelna amin a pampanunotda, ket ammona amin nga aramidda.

¹⁶Saan nga agballigi ti ari gapu iti nabileg nga armadana; saan a maispal ti mannakigubat gapu iti nagpaiduma a pigsana.

¹⁷Awan maitulong ti pakigubat a kabalio a manggun-od iti balligi; saanna a maispal ti siasinoman babaen iti amin a bilegna.

¹⁸Salluadan ti Apo dagiti agbuteng kenkuana; wen, salluadanna dagiti agtalek iti saan nga agbalbaliw nga ayatna.

¹⁹Iti patay, isalakanna ida; iti tiempo ti bisin, dina ipalubos a matayda.

²⁰Isaadtayo iti Apo ti namnamatayo; isu ti mangtulong ken mangsalaknib kadatayo.

²¹Naragsaktayo gapu kenkuana; agtalektayo iti nasantoan a naganna.

²²O Apo, itedmo koma kadakami ti di agbalbaliw nga ayatmo, ta italekmi kenka ti namnamami.