Read Iloko Psalms 34 Bible Online

Psalms 34 - Iloko bible

Psalms 34

¹Iti amin a tiempo, agyamanak iti Apo, diakto agsardeng a mangidaydayaw kenkuana.

²Ipannakkelko ti Apo gapu iti inaramidna; mangngeg koma dagiti maidaddadanes ket agragsakda!

³Danggayandak a mangitan-ok iti Apo; agmaymaysatayo a mangidaydayaw iti naganna!

⁴Immawagak iti Apo ket sinungbatannak; inispalnak kadagiti amin a pagbutbutngak.

⁵Kumita kenkuana dagiti maidaddadanes ket maragsakanda; pulos a saandanto a mabainan.

⁶Umawag dagiti nakapuy ken ni Yahweh ket sungbatanna ida; isalakanna ida kadagiti amin a pakariribukanda.

⁷Aywanan ti anghel ni Yahweh dagiti agbuteng kenkuana, ket ispalenna ida iti amin a pagpeggadanda.

⁸Dakayo a mismo ti mangtakuat iti kinaimbag ti Apo! Nagasat ti tao nga agkamang kenkuana!

⁹Agbutengkayo iti Apo, dakay amin a tattaona; awan pagkurangan dagiti agtungpal kenkuana.

¹⁰Uray dagiti leon maawananda iti kanen ket agbisinda, ngem dagiti agtulnog iti Apo, adda amin nga imbag kadakuada.

¹¹Umaykayo, annakko, ket denggendak, ta isurokayo nga agraem iti Apo.

¹²Siasino kadakayo ti mayat nga aglak-am iti nasayaat a biag? Siasino ti agkalikagum iti atiddog ken naragsak a panagbiag?

¹³Aywanam ta dilam kadagiti dakes a sao; ken ta bibigmo iti kinakillo.

¹⁴Adaywanyo ti dakes ket agaramidkayo iti naimbag. Ikagumaanyo a gun-oden ti kappia iti amin a pusoyo.

¹⁵Dagiti nalinteg bantayan ti Apo ida ket denggenna dagiti asugda.

¹⁶Ngem dagiti agaramid iti dakes, busorenna, inton matayda, awanton ti makalagip kadakuada.

¹⁷Umawag dagiti nalinteg iti Apo ket ipangagna ida; tulonganna ida kadagiti amin a pakarigatanda.

¹⁸Umasideg ti Apo kadagiti maupay; isalakanna dagiti awanen a pulos ti namnamana.

¹⁹Agsagaba iti adu a rigat ti tao a naimbag, ngem isalakan ti Apo kadagiti amin a parikut.

²⁰Dayta a tao aywananto ti Apo, ket awanto ti matukkol a tulangna.

²¹Ti dakes nga aramid dagiti managdakdakes isunto met laeng ti mangpatay kadakuada, ket madusanto dagiti gumura kadagiti nalinteg.

²²Subbotento ti Apo dagiti adipenna; dinto maan-ano dagiti agkamang kenkuana.