Read Iloko Psalms 36 Bible Online

Psalms 36 - Iloko bible

Psalms 36

¹Ti managbasol kunana iti kaunggan ti pusona, a dina bigbigen ti Dios ket awan panagbutengna kenkuana.

²Agsipud ta nangato unay ti panangipapanna iti bagina, ipagarupna a dinto masukalan ti basolna ket dinto madusa.

³Dakes ti sasawenna ken pasig nga ulbod, insardengnan ti agaramid iti nalinteg ken naimbag.

⁴Agplano iti dakes no agid-idda; awan pay naimbag nga aramidenna, ket dina laksiden ti aniaman a dakes.

⁵Dumanon sadi langit, O Apo, ti di agbalbaliw nga ayatmo; tumukno kadagiti ulep ti kinapudnom.

⁶Natibker a kas kadagiti bantay ti kinalintegmo, kas iti kaadalem ti taaw dagiti pangngeddengmo. Sika, O Apo, ti mangaywan iti animal ken tao.

⁷Nagpateg ketdin, O Dios, ti di agbalbaliw nga ayatmo! Agkamang dagiti tattao iti salinong dagiti payakmo.

⁸Agpennekda kadagiti nawadwad a taraon iti balaymo; painumem ida iti karayan ti kinaimbagmo.

⁹Sika ti pagtaudan ti amin a biag, ket gapu iti silawmo, makitami ti lawag.

¹⁰Ituloymo kadi nga ayaten dagiti makaam-ammo kenka, ket ipaaymo ti imbag kadagiti nalinteg ti panagbiagda.

¹¹Dimo ipalubos a darupendak dagiti natangsit, wenno pagtarayendak dagiti managdakdakes.

¹²Kitaem ti lugar a nakatuangan dagiti managdakdakes! Napasagda iti daga ket didan makabangon nga is-isuda.