Read Iloko Psalms 37 Bible Online

Psalms 37 - Iloko bible

Psalms 37

¹Dika agsikor gapu kadagiti managdakdakes; dimo apalan dagiti agaramid iti dakes.

²Ta mapukawdanto a kas ruot a magango; kas mula malaylay, mataydanto.

³Agtalekka iti Apo ket agaramidka iti naimbag. Agnaedka iti daga ket awan pakaan-anoam.

⁴Sapulem iti Apo ti pagragsakam, ket itednanto ti tartarigagayam.

⁵Ikumitmo ta bagim iti Apo; agtalekka kenkuana ket tulongannaka.

⁶Pagraniagennanto a kas aldaw ti kinaimbagmo, ken kas iti init ti agmatuon ti kinalintegmo.

⁷Aganuska ket urayem nga agtignay ti Apo. Dimo pakasikoran dagiti rumang-ay ti panagbiagda, wenno dagiti agballigi iti dakes a panggepda.

⁸Igagam ta pusom iti nalaus a panagpungtot. Yegna laeng ti riribuk.

⁹Dagiti agtalek iti Apo, tagikuaendanto ti daga. Ngem dagiti managdakdakes, mapagtalawda nga awan duadua.

¹⁰Iti saan a mabayag, mapukawto dagiti managdakdakes, uray no sapulem ida, awandanton iti sigud nga ayanda.

¹¹Ngem dagiti napakumbaba tagikuaendanto ti daga, ken lak-amendanto ti rang-ay ken talna.

¹²Ti managdakdakes isikatna ti nalinteg, ket agngariet iti gurana kenkuana.

¹³Ngem katawaan ti Apo ti managdakdakes, ta ammona nga asidegen ti ipapatayna.

¹⁴Asuten dagiti managdakdakes ti kampilanda, biatenda ti bai ti panada tapno patayenda dagiti napanglaw ken marigrigat, ken gudasenda dagiti nalinteg ti aramidda.

¹⁵Ngem maduyokdanto kadagiti kampilanda a mismo, ket dagiti bai ti panada, matukkolto.

¹⁶Napatpateg nga adayo ti sangkabassit a sanikua ti nalinteg ngem ti amin a kinabaknang ti managdakdakes.

¹⁷Ikkaten ti Apo ti pigsa dagiti managdakdakes, ngem salaknibanna dagiti nalinteg.

¹⁸Aywanan ti Apo dagiti agtulnog kenkuana, ket tawidendanto nga agnanayon ti daga.

¹⁹Didanto agsagaba iti tiempo ti didigra; iti tiempo ti bisin, dinto agkurang ti kanenda.

²⁰Ngem matayto dagiti managdakdakes; mapukawto dagiti kabusor ni Yahweh a kas balang a sabsabong; agpukawdanto a kas asuk.

²¹Umutang ti managdakdakes ket saan nga agbayad, ngem sibubuslon a mangted ti nalinteg.

²²Dagiti binendisionan ni Yahweh, tawidendanto ti daga, ngem mapagtalawto dagiti inlunodna.

²³Ti Apo ti mangidalan iti tao iti rumbeng a pagnaanna, ket salaknibanna dagiti mangparagsak kenkuana.

²⁴Uray no maitibkol, awan duadua ti ibabangonna, ta tengtenglen ti Apo ti imana.

²⁵Nagubingak ngem ita lakayakon, ngem awan pay nakitak a nalinteg a binaybay-an ti Apo, wenno dagiti annakna a makipalpalama.

²⁶Managparabur ken managpabulod ti naimbag a tao, ket agbalin a bendision dagiti annakna.

²⁷Adaywam ti dakes ket aramidem ti naimbag, ket agnaedto ti kaputotam nga agnanayon iti daga.

²⁸Ayaten ti Apo ti hustisia, dina baybay-an dagiti napudno a tattaona. Salaknibanna ida nga awan inggana, ngem mapagtalawto ti kaputotan dagiti managdakdakes.

²⁹Dagiti nalinteg tawidendanto ti daga, ket iti agnanayon, agnaeddanto a natalna.

³⁰Ti nalinteg a tao, nainsiriban dagiti balikasna, ket tumutop dagiti amin a sasawenna.

³¹Salimetmetanna ti linteg ti Dios iti pusona, ket saanna a pagpanawan.

³²Ti managdakdakes siimenna ti naimbag a tao, ket isikatna a papatayen.

³³Ngem dinto baybay-an ni Yahweh a matnag iti pannakabalin ti kabusorna; ket inton maidarum, dinanto met palubosan a madusa.

³⁴Mangnamnamaka iti Apo ket tungpalem dagiti bilbilinna. Padayawannakanto babaen iti pannangtedna iti daga, ket makitamto ti pannakapaksiat ti managdakdakes.

³⁵Nakitak ti maysa a tao a nadangkes; narangpaya ken nangato a kas iti sedro ti Libano.

³⁶Idi lumabasak iti naminsan, awanen sadiay; binirbirokko ngem saankon a nasarakan.

³⁷Siputam ti naimbag a tao, paliiwem ti nalinteg; adda kaputotan ti natalna a tao.

³⁸Ngem madadael a mamimpinsan dagiti managbasol, ket maikisap dagiti kaputotanda.

³⁹Isalakan ti Apo dagiti nalinteg a tattao, ket salaknibanna ida iti tiempo ti riribuk.

⁴⁰Tulongan ken ispalenna ida; isalakanna ida kadagiti managdakdakes, ta agkamangda a pasalakniban kenkuana.