Read Iloko Psalms 40 Bible Online

Psalms 40 - Iloko bible

Psalms 40

¹Siaanusak a nagur-uray iti Apo; inallingagnak ket dinengngegna ti asugko.

²Iti napeggad nga abut inaonnak, kasta met iti gayong-gayong a nakailumlomak. Iti rabaw ti bato insagpatnak, iti kasta, natalged ti pannagnak.

³Insuronak nga agkanta iti baro a himno, maysa a kanta a pagdaydayaw iti Diostayo. Agbutengto ti adu a makakita, ket iti Apo agtalekda.

⁴Nagasat ti tao a ti Apo ti pagtalkanna, ket saan a dagiti napasindayag ti pagkamanganna, wenno agdaydayaw kadagiti didiosen.

⁵Adu ti impapaaymo kadakami, O Apo a Diosmi. Awan ti kas kenka. Adu dagiti nakaskasdaaw a panggepmo kadakami. Diak maisao amin ida, ta naruayda.

⁶Dagiti daton ken sagut dimo tarigagayan; dimo kiddawen ti daton a mapuoran, wenno daton tapno ti basol mapakawan. Inikkannak ketdi iti lapayag tapno mangngegka,

⁷iti kasta kinunak, “Adtoyak. Adda dagiti bilbilinmo kaniak iti libro ti Linteg.

⁸Ti panangtungpal iti pagayatam, O Dios, isut' ragsakko. Ipapusok dagiti bukodmo a pannursuro.”

⁹Iti taripnong dagiti amin a tattaom, O Apo, imbagak ti naimbag a damag a mangisalakanka. Ammom a diakto agsardeng a mangipakaammo.

¹⁰Diak inlimlimed ti damag ti panangisalakanmo; kanayon nga ibagbagak ti kinapudnom ken ti panangispalmo. Wen, diak inlimlimed ti di agbalbaliw nga ayat ken kinapudnom, iti dakkel a taripnong dagiti tattaom.

¹¹Ammok, O Apo, a dimonto isardeng ti mangngaasi kaniak! Ti di agbalbaliw nga ayat ken kinapudnom ti kanayon a pagtalgedak.

¹²Dagiti kinadakes a nanglikmut kaniak aduda; Dagiti basbasolko inaddagandak, ket saanakon a makakita. Ad-aduda ngem dagiti buok iti ulok, ket awanen ti natda a turedko.

¹³Kaasiannak, O Apo, ket isalakannak. Umaykan ta tulongannak!

¹⁴Mawarawara koma a mamimpinsan ken maibabain dagiti agpanggep a mangdangran kaniak. Mapasanud koma ken maibabain dagiti agragsak gapu iti pakariribukak.

¹⁵Kasta met dagiti mangang-angaw kaniak kumapsutda koma iti inda pannakaabak.

¹⁶Agragsak ken agrag-oda koma amin nga umay agkamang kenka! Amin a mangipateg iti panangisalakanmo kanayon koma a kunada, “Nagtan-ok ketdin ti Apo!”

¹⁷Nakurapay ken nakakaasiak, ngem silalagipka, kaniak, O Apo. Sika ti salakan ken Diosko— O Diosko, darasem ti umay tumulong kaniak!