Read Iloko Psalms 41 Bible Online

Psalms 41 - Iloko bible

Psalms 41

¹Nagasat ti tao a tumulong kadagiti napanglaw; isalakanto ni Yahweh iti tiempo ti riribuk.

²Salaknibanto ni Yahweh ket salluadannanto ti biagna. Paragsakennanto iti daga a pagnaedanna saannanto a yawat kadagiti kabusorna.

³No agsakit, aywananto ni Yahweh ket umimbagto.

⁴“O Apo, nagbasolak kenka,” kinunak, “kaasiannak koma ket paimbagennak.”

⁵Dagiti kabusorko padpadaksendak; kayatda a matayak ket malipatanakon iti agnanayon.

⁶Saan a napudno dagiti sumarungkar kaniak; agbirbirokda laeng iti pakadadaelak; Ket iwarasda a pakasarsaritaak.

⁷Pagtutungtongandak dagiti gumurgura kaniak; agpanunotda iti kadadaksan a pagbanagak.

⁸Kunada, “Nadagsen a sakit ti kimpet kenkuana, naidalit iti pagiddaan ket awanen ibabangonna.”

⁹Uray ti kadekketan a gayyemko a nagtaltalkak, ti gayyemko a nakipangpangan kaniak, uray isu, tinallikudannak.

¹⁰Kaasiannak, ket paimbagennak, O Apo, tapno mabalinko a balsen dagiti kabusorko.

¹¹Kastoyto a maammoak a maay-ayoka kaniak, awanto ti siasinoman a kabusor a pakaparmekak.

¹²Saranayennak agsipud ta naimbagak; iti imatangmo agnanayon nga aywanannak.

¹³Madaydayaw ti Apo a Dios ti Israel! Agdaydayawkayo kenkuana ita ken iti agnanayon awan inggana. Amen! Amen!