Read Iloko Psalms 42 Bible Online

Psalms 42 - Iloko bible

Psalms 42

¹Kas iti panangtarigagay ti ugsa iti nalamiis a danum ti waig, kasta met, O Dios, ti panangtarigagayko kenka.

²Mawawak iti sibibiag a Dios; Kaanonto a mabalinko ti mapan agdaydayaw iti sangoananna?

³Aldaw-rabii nga agsangsangitak, ket pannakataraonko dagiti luluak. Kanayon a saludsoden dagiti kabusorko, “Sadino ti ayan ti Diosmo?”

⁴Lumdaangak no malagipko ti napalabas: kakuykuyogko idi dagiti mapmapan iti balay ti Dios. Ipanguloak ti naragsak a bunggoy a mangikankanta ken mangipukpukkaw iti pagdaydayaw iti Dios.

⁵Apay aya a maladladingitanak? Apay aya a mariribukak? Mangnamnamaak iti Dios, ket idaydayawko manen ti Diosko a mangisalakan kaniak.

⁶Iti daytoy a lugar a nakaipanak, iturongko kenkuana ti panunotko ta kasta unay ti lidayko. Inyegna dagiti dalluyon ti ladingit iti kararuak; kas layus nga agdaranudor ti riribuk iti kaunggak,

⁷kas dissuor ti agtinnag a danum iti Jordan, manipud Bantay Hermon ken Bantay Mizar.

⁸Sapay koma ta inaldaw nga ipakita ni Yahweh ti di agbalbaliw nga ayatna tapno iti rabii agkantaak iti pagdaydayaw kenkuana, maysa a kararag iti Dios ti biagko.

⁹Kunak iti Dios a salaknibko, “Apay a linipatannak? Apay a di agsarday ti panagsagabak iti kinaranggas dagiti kabusorko?”

¹⁰Marunawak iti panangpabpabainda kaniak, iti kanayon a panangsalsaludsodda, “Sadino ti ayan ti Diosmo?”

¹¹Apay aya a maladladingitanak? Apay aya a mariribukak? Mangnamnamaak iti Dios, ket idaydayawko manen, ti mannubbot ken Diosko.