Read Iloko Psalms 44 Bible Online

Psalms 44 - Iloko bible

Psalms 44

¹O Dios, mismo a lapayagmi ti nakangngeg, imbaga kadakami dagiti kapuonanmi dagiti naindaklan a banag nga inaramidmo idi tiempoda, kadagiti aldaw idi un-unana:

²no kasano ti panangpaksiatmo kadagiti nasnasion, ket impasdekmo dagiti tattaom iti dagada; no kasano a dinusam dagiti dadduma a pagilian, ket pinarang-aymo dagiti tattaom.

³Dida pinarmek ti daga iti kampilan wenno bilegda, ngem babaen iti pannakabalin ken pigsam, babaen iti pammatalged ti kaaddam, a mangpaneknek nga inay-ayatmo ida.

⁴Sika ti Arik ken Diosko; pagballigiem dagiti tattaom.

⁵Babaen iti pannakabalinmo inlugesmo dagiti kabusormi.

⁶Diak nagtalek iti bai ti panak, kasta met ti kampilanko tapno isalakannak.

⁷Ngem insalakannakami kadagiti kabusormi, pinarmekmo dagiti gumurgura kadakami.

⁸Idaydayawdakanto latta; agyamankaminto kenka iti agnanayon awan inggana.

⁹Ngem, linaksidnakamin ket impalubosmo a maparmekkami, saanka metten a kumuykuyog iti armadami.

¹⁰Impalubosmo nga intarayanmi dagiti kabusormi, ket sinamsamda dagiti sanikuami.

¹¹Impalubosmo a mapartikami a kas karnero, inwaraswarasnakami kadagiti ganggannaet a nasion.

¹²Inlakom dagiti tattaom, nalaka ti nangilakoam kadakuada a kasla ket awanen patpategda.

¹³Makita dagiti kaarrubami ti inaramidmo kadakami; lalaisen ken pagang-angawandakami.

¹⁴Inaramidnakam a pagkakatawaan dagiti nasnasion; agwingwingiwingda a mangumsi kadakami.

¹⁵Kankanayon a malalaisak, ket iti bain, malapunosak

¹⁶iti pannakangngegko kadagiti uyaw ken insulto, dagiti gumurgura kaniak ken kabusorko.

¹⁷Napasamak amin dagitoy uray didaka nalipatan. Dimi met sinalungasing ti tulagmo.

¹⁸Napudnokami latta ket dimi sinukir dagiti bilinmo.

¹⁹Nupay kasta, binaybay-annakami iti disso a taeng dagiti narungsot nga animal. Inabongotannakami iti sipnget ni patay.

²⁰No nagsardengkami a nagdaydayaw kenka, O Dios, ket nagdaydayawkami kadagiti didiosen,

²¹awan duadua a maammoam ta ammom ti amin dagiti nalimed a pampanunotmi.

²²Ngem gapu kenka, inoras nga adda matay kadakami; mayarigkami kadagiti karnero a maparti.

²³Agriingka, O Apo! Apay a matmaturogka? Bumangonka! Dinakami laksiden iti awan inggana!

²⁴Apay nga ilemlemmengannakami? Dimo lipaten dagiti panagsagsagabami!

²⁵Naparukma ken naibabainkami; iti tapok naidasaykami.

²⁶Bumangonka ket tulongannakami! Gapu iti di agbalbaliw nga ayatmo isalakannakami!