Read Iloko Psalms 45 Bible Online

Psalms 45 - Iloko bible

Psalms 45

¹Putarek daytoy a kanta a mairuknoy iti ari, iti panunotko agubbog ti agkakapintas a balikas; kas iti pluma ti maysa a nalaing a mannurat, toy dilak maysa a daniw ti inna yebkas.

²Sika ti kataeran a lalaki, nalaingka unay nga agbitla; binendisionannaka ti Dios iti awan inggana.

³Ibarikesmo ta kampilanmo, nabileg nga ari; nadayag ken nadaegka.

⁴Iti naarian a kinadayagmo, inka salakniban ti kinalinteg ken kinapudno. Iti kinapigsam, naindaklanto dagiti balligi a magun-odmo.

⁵Natirad dagiti panam, salputenda ti puso dagiti kabusormo; sumuko kenka dagiti pagilian.

⁶Mataginayon nga awan inggana ti pagariam, O Dios. Iturayam dagiti tattaom babaen iti hustisia;

⁷ayatem ti naimbag ket guraem ti dakes. Isu a pinilinaka ti Dios; wen, ti Diosmo ket ad-adu a bendision ti impaayna kenka ngem ti uray siasinoman nga ari.

⁸Agayamuom ti mirra, aloe, ken kasia iti amin a kawesmo; iti uneg dagiti marfil a palasio linglingayendaka kadagiti nakuerdasan a pagtokaran.

⁹Kadagiti bayabaymo, mairaman dagiti prinsesa; iti makannawanmo, adda ti reyna nga agkakapateg nga alahas a balitok ti arruatna.

¹⁰Sika nga asawaen ti ari, denggem ti innak ibaga: dagiti tattaom ken kakabagiam lipatemon ida.

¹¹Gapu iti pintasmo tarigagayannaka ti ari; isun ti apom, tungpalem ngarud ti kayatna.

¹²Yegandaka kadagiti sagut dagiti taga-Tiro; kayat dagiti babaknang a gun-oden ti tulongmo.

¹³Adda ti prinsesa iti palasio—nagpintasen! Naibinggas ti balitok a sinulid iti trahena.

¹⁴Rumimatrimat ti kawesna ket maitulod iti ayan ti ari, sarsarunoen dagiti bayabayna a babbai ket mayasidegda met iti ari.

¹⁵Sirarag-o ken siraragsakda a sumrek iti palasio.

¹⁶Adunto ti annakmo a lallaki, sika nga arik, a sumukatto kadagiti kapuonam, ket pagturayemto ida iti daga.

¹⁷Taginayonento ti kantak ti agdindinamag a naganmo, ket iti amin a tiempo, idaydayawdakanto dagiti tattao.