Read Iloko Psalms 46 Bible Online

Psalms 46 - Iloko bible

Psalms 46

¹Ti Dios ti kamang ken pigsatayo; sisasagana a tumulong iti nariribuk a tiempo.

²Ditay ngarud agbuteng uray no agginggined, ken margaay dagiti bantay a maigabor iti taaw,

³uray no agdaranudor dagiti baybay, ken magunggon dagiti turod gapu iti dawelna.

⁴Adda karayan a mangted rag-o iti siudad ti Dios, iti nasantoan a pagtaengan ti Kangatoan.

⁵Iti daytoy a siudad, agnaed ti Dios; awanto pakaan-anoanna, dinto marsuod, parbangon pay laeng tulongannan.

⁶Agkintayeg dagiti pagilian, aglagaw dagiti pagarian, aggurruod ti Dios ket marunaw ti daga.

⁷Adda kadatayo ti Apo a Mannakabalin-amin; ti Dios ni Jacob ti kamangtayo.

⁸Umayyo kitaen ti inaramid ti Apo! Imutektekanyo dagiti nakaskasdaaw nga inaramidna ditoy daga!

⁹Pagsardengenna dagiti gubat iti sangalubongan; dadaelenna dagiti pana, tukkolenna dagiti gayang, ken puoranna dagiti lugan a pakigubat.

¹⁰“Isardengyo ti aggugubat ket ammoenyo a siak ti Dios,” kunana. “Siak ti kangatoan kadagiti nasion, katan-okan iti entero a lubong!”

¹¹Adda kadatayo ti Apo a Mannakabalin-amin; ti Dios ni Jacob ti kamangtayo!