Read Iloko Psalms 48 Bible Online

Psalms 48 - Iloko bible

Psalms 48

¹Naindaklan ti Apo, ket maikari a maidaydayaw iti siudad ti Diostayo, iti nasantoan a bantayna.

²Nangato ken napintas ti Bantay Sion a pagtaengan ti Dios; ti siudad ti naindaklan nga Ari mangyeg iti rag-o iti sangalubongan.

³Impakita ti Dios nga adda talged iti kaaddana iti uneg dagiti sarikedked ti siudad.

⁴Nagmaymaysa dagiti ari a rimmaut iti Bantay Sion.

⁵Ngem idi makitada ti siudad, nasdaawda, nagbutengda ket nagtatarayda.

⁶Sadiay nagpigergerda iti buteng ken danag, a kas iti babai nga agpaspasikal,

⁷ken kas kadagiti dadakkel a barko a mayallo-allon iti nadawel a bagio.

⁸Nadamagmi dagiti aramid ti Dios, ket ita, nakitamin ida iti siudad ti Diostayo, ti Apo a Mannakabalin-amin; salaknibanna nga agnanayon ti siudad.

⁹Iti uneg ti Templom, O Dios, ut-utobenmi ti di agbalbaliw nga ayatmo.

¹⁰Idaydayawdaka dagiti tattao iti amin a lugar; agdindinamag ti naganmo iti entero a daga. Nalinteg ti panangituraymo;

¹¹agrag-o koma dagiti tattao ti Sion! Nalinteg ti pangngeddengmo; agrag-o koma dagiti siudad ti Juda!

¹²Likmutenyo ti Bantay Sion, tattao ti Dios, ket bilangenyo dagiti torrena.

¹³Kitaenyo dagiti bakudna ket sukimatenyo dagiti sarikedkedna tapno maibagayo iti sumaruno a kaputotan

¹⁴a daytoy a Dios, isu ti Diostayo iti agnanayon nga awan inggana; idalannatay iti amin a tiempo.