Read Iloko Psalms 49 Bible Online

Psalms 49 - Iloko bible

Psalms 49

¹Dumngegkayo, dakay amin a tattao! Ipangagyo daytoy, tattao iti amin a disso,

²natan-ok man wenno nanumo, nabaknang man wenno napanglaw.

³Nalawag dagiti innak ibalikas, nainsiriban dagiti innak isawang.

⁴Yallingagko ti lapayagko iti maysa a pagsasao ket ilawlawagko ti kaipapananna bayat ti panagtokarko iti arpa.

⁵Saanak nga agbuteng iti tiempo ti peggad, no kadagiti dakes a kabusor, malawlawak

⁶wenno kadagiti tattao nga agtalek iti kinabaknangda, ket pagpasindayagda ti adu a sanikuada.

⁷Pulos a dinto masubbot ti tao ti bagina; saanna met a mabayadan ti biagna iti Dios,

⁸ta nangina unay ti subbot ti biag ti tao. Ti kabaelanna nga ibayad dinto makaanay

⁹tapno mabalinna ti agbiag nga agnanayon, ket mailisi iti tanem.

¹⁰Makita ti siasinoman nga uray dagiti masirib matayda, kasta met ti mapasamak kadagiti maag ken nengneng, ket mabati ti kinabaknangda kadagiti kaputotanda.

¹¹Dagiti tanemda ti taengda nga agnanayon, sadiay ti pagnaedanda iti amin a tiempo, uray pay no adda idi bukodda a daga.

¹²Ti kinadaeg dina mailisi ti tao iti patay; matayto a kas kadagiti animal.

¹³Kastoy ti pagbanagan dagiti agtalek iti bagida, Kastoy ti pagtungpalan dagiti mapnek iti kinabaknangda;

¹⁴naitudingda a matay a kas karnero, ket ni Patay ti pastordanto. Parmekento ida dagiti nalinteg bayat ti panagrupsa ti bagida iti lubong dagiti natay, adayoda kadagiti pagtaenganda!

¹⁵Ngem isalakannakto ti Dios; iti pannakabalin ni patay, alawennakto.

¹⁶Dika agbuteng no bumaknang ti maysa a tao, no dagiti sanikuana, umadu la nga umadu,

¹⁷ta inton matay dinanto maitugot ida; dinanto maikuyog iti tanem ti kinabaknangna.

¹⁸Uray no mapnek ti tao iti agdama a biag, wenno maidaydayaw gapu iti kinarang-ayna,

¹⁹matayto met laeng a kas kadagiti kapuonanna, ket maitiponto kadakuada iti sipnget nga awan inggana.

²⁰Ti kinadaeg dina mailisi ti tao iti patay; matayto a kas kadagiti animal.