Read Iloko Psalms 50 Bible Online

Psalms 50 - Iloko bible

Psalms 50

¹Agsao ti Apo a Dios a Mannakabalin-amin; ayabanna ti entero a lubong, manipud daya agingga iti laud.

²Agraniag ti Dios manipud iti Sion, ti nagpaidumat' pintasna a Sion, awan pagkuranganna.

³Umay ti Diostayo, ngem saan a di madlaw; adda apuy a gumilgil-ayab iti sangoananna, ken nadawel a bagio iti lawlawna.

⁴Awaganna ti langit ken daga a mangsaksi iti panangukomna iti ilina.

⁵Kunana: “Ummongenyo iti sangok dagiti napudno a tattaok a nakitulag kaniak babaen iti panangidatonda iti sakrifisio.”

⁶Ibunannag ti langit a nalinteg ti Dios, ket isu met laeng ti ukom.

⁷“Tattaok, dumngegkayo ket innak agsao; maibusor kenka, Israel, ti pammaneknekko. Siak ti Apo a Diosmo.

⁸Saanka a tubngaren gapu kadagiti sakrifisiom, kadagiti daton a mapuoran a kanayon nga idatagmo.

⁹Maysa pay, diak masapul dagiti baka wenno kalding kadagiti arbanmo;

¹⁰kukuak ngamin dagiti animal iti kabakiran, ken dagiti baka iti rinibu a katurturodan.

¹¹Kukuak met amin a tumatayab iti tangatang, kasta met amin nga adda biagna iti kataltalonan.

¹²“Uray no mabisinak, diak agkiddaw kenka, ta kukuak ti lubong ken amin a linaonna.

¹³Agsidsidaak aya iti baka? Umin-inumak aya iti dara ti kalding?

¹⁴Ti panagyamanmo isu komat' sakrifisiom iti Dios; itedmo iti Kangatoan ti amin nga inkarim.

¹⁵No umay ti riribuk, awagannak; ispalenkanto ket idaydayawnakto.”

¹⁶Ngem kuna ti Dios iti managdakdakes: “Awan serserbina a balbaliksem dagiti bilinko. Awan kapapay-an ti panangsarsaritam iti tulagko.

¹⁷Ngamin, kaguram ti disiplina, dimo dengdenggen dagiti patigmaanko kenka.

¹⁸No makakitaka iti mannanakaw, agbalinka a gayyemna, ket makipulpulapolka kadagiti mannakikamalala.

¹⁹“Madadaanka nga agsao iti dakes; saanka nga agalikaka nga agulbod.

²⁰Madadaanka a mangidarum iti kabsatmo, ket parnuayem ti pammabasolmo.

²¹Inaramidmo amin dagitoy ngem diak nagtagtagari; iti kasta, impagarupmon a kaslaak met kenka. Ngem ita, babalawenka, ket ilawlawagko ti amin kenka.

²²“Utobenyo daytoy, dakay a di mangikankano kaniak, ta no saan, dadaelenkayo, ket awan ti makaisalakan kadakayo.

²³Ti mangipaay iti sakrifisio mangted iti pannakapadayawko ket awan duadua a ti agtulnog kaniak isalakanko.”