Read Iloko Psalms 51 Bible Online

Psalms 51 - Iloko bible

Psalms 51

¹Gapu iti di agbalbaliw nga ayatmo kaasiannak kadi, O Diosko. Gapu iti kinamanangngaasim, punasem kadi dagiti basolko.

²Ugasam a mamimpinsan ti kinadakesko, ket dalusannak kadagiti basbasolko!

³Bigbigek a nagbiddutak, ket kadagiti basbasolko silalagipak.

⁴Nagbasolak kenka, wen, sika laeng ti nagbasolak, nagaramidak iti dakes iti imatangmo. Iti kasta, nalinteg ti panangukommo kaniak, ket nainkalintegan ti pannakadusak.

⁵Adtoy a naipasngayak iti kinadakes, ket iti basol nainawak.

⁶Tarigagayam ti kinapudno ken nadalus a puso; punnoem ti panunotko iti siribmo.

⁷Ugasannak iti basolko tapno nadalusak; buggoannak ket napudpudawakto ngem kapas.

⁸Kayatko a mangngeg ti rag-o ken ragsak; agragsakak manen nupay rinumek ken tinuktukkolnak.

⁹Dimo koma ikaskaso dagiti basolko; punasem amin a kinadakesko.

¹⁰Parsuaem kaniak, O Dios, ti nadalus a puso, ket ikkannak iti baro ken napudno nga espiritu;

¹¹dinak pagtalawen iti imatangmo; dimo ipanaw kaniak ti Espiritu Santo.

¹²Isublim kaniak ti rag-o ti panangisalakanmo, ket ikkannak iti natulnog nga espiritu.

¹³Iti kasta, isurokto dagiti bilinmo kadagiti managbasol tapno agsublida kenka.

¹⁴O Dios, ispalem ti biagko, ket isalakannak; iti kasta, naragsakakto a mangipakaammo iti kinalintegmo.

¹⁵Apo, luktam dagiti bibigko ket ipaduyakyakkonto ti pannakaidaydayawmo.

¹⁶Dimo kayat dagiti daton a sakrifisio; ta no kayatmo koma, isuda ti idatonko; dika met maay-ayo iti daton a mapuoran.

¹⁷O Dios, ti napakumbaba nga espiritu ti sakrifisiok kenka; dimonto laksiden ti puso a napakumbaba ken nagbabawi.

¹⁸Kaasiam ti Sion, O Dios, ket tulongam, bangonem dagiti narba a bakud ti Jerusalem.

¹⁹Iti kasta, maragsakankanto kadagiti tumutop a sakrifisio, ken amin a mapuoran a daton, ket mapuoranto dagiti toro a baka iti altarmo.