Read Iloko Psalms 55 Bible Online

Psalms 55 - Iloko bible

Psalms 55

¹O Dios, denggem ti kararagko; dimo pagintutulngan toy dawatko!

²Timudennak kadi, ket sungbatannak; mautoyanakon kadagiti pakarikutak.

³Madanaganak kadagiti pammutbuteng dagiti kabusorko; mariribukak iti panangidadanes dagiti dakes a tattao. Parikut ti yegda kaniak; kapungtot ken kaguradak.

⁴Toy pusok matuohan unay, nagtupak kaniak dagiti alliaw ni patay.

⁵Malmesak iti buteng ket agtigtigergerak; wen, ti alinggaget lapunosennak.

⁶Kunak, “Kalapatiak la koma a nagpayak! Agtayabak a sumapul iti paginanaak!

⁷Wen, innak iti adayo a disso, ket iti let-ang ti pagtaengak.

⁸Iti napigsa nga angin ken bagio, agdardarasak a bumirok iti paglinongak.”

⁹Dadaelem ida, Apo, ket dimo pagkikinnaawaten ida; damsak ken riribuk iti siudad ti innak makita.

¹⁰Aldaw-rabii a lawlawlawenda, ket agsaknap ti dakes ken riribuk iti unegna.

¹¹Adda pannakadadael iti amin a sulina; agsaknap ti panangidadanes ken panangliput kadagiti kalsada.

¹²No koma kabusor ti manglalais kaniak, maibturak; wen, maibturak. No koma kagurgurak ti mangab-abi kaniak, mailemmengak; wen, mailemmengak.

¹³Ngem, gayyem, sika met gayam, sika a kapulpulapol ken nasinged a pagayam!

¹⁴Masansan idi nga agpimpinnatigmaanta; iti Templo, agkuykuyogta a mapan agdaydayaw.

¹⁵Dagiti kabusorko kellaatda koma a matay; sibibiagda koma a mapan iti lubong dagiti natay. Ta dakes ti adda iti taeng ken iti pusoda.

¹⁶Ngem iti biangko, agpatulongak ken Apo Dios, ket isalakannakto.

¹⁷Umararawak kenkuana iti agsapa, agmatuon ken rabii, ket ipangagnanto ti timekko.

¹⁸Subbotennakto kadagiti gubat a pakidangadangak; adu unay ti bumusor kaniak.

¹⁹Ti Dios a nagturay manipud un-unana, denggennakto ket parmekennanto ida; awan maaramidda ta dida agbuteng kenkuana.

²⁰Dinarup ti sigud a kaduak dagiti gagayyemna; sinalungasingna ti nagtutulaganda.

²¹Nalamlamuyot ngem mantikilia dagiti balikasna, ngem adda gura iti pusona; makabang-ar dagiti saona a kasla sapsapo a lana, ngem sumugatda a kasla natadem nga espada.

²²Ikamangmo dagiti parikutmo iti Apo, ket ikaluyanakanto; dina ipalubos a maparmek ti naimbag a tao.

²³Ngem sika, O Dios, igarangugungmonto iti abut dagita a mammapatay ken ulbod sakbay a madanonda ti kagudua ti panagbiagda; ngem no siak, agtalekak latta kenka.