Read Iloko Psalms 57 Bible Online

Psalms 57 - Iloko bible

Psalms 57

¹Kaasiannak, O Dios; wen, kaasiannak, ta sika ti pagkamangak. Iti salinong dagiti payakmo, salaknibannak, agingga a makalabas amin a peggad.

²Ti Dios a Kangatoan isut' asugak, iti Dios a mangted iti amin a kasapulak.

³Manipud langit, sungbatannak ket isalakannak; parmekennanto dagiti mangdardarup kaniak. Ipaayto ti Dios ti di agbalbaliw nga ayat ken kinapudnona kaniak.

⁴Adda dagiti kabusor iti aglawlawko; arigda leon a mangalun-on iti tao. Kasla gayang ken pana dagiti ngipenda, kasla natadem a kampilan ti dilada.

⁵Ipakitam ti kinatan-okmo, O Dios, iti tangatang, ken ti dayagmo a mangpunno iti entero a daga.

⁶Nangipakat dagiti kabusorko iti iket a pangsilo kaniak ket kasta unay ti butengko. Nagkalida iti palab-og iti pagnaak, ngem isuda met laeng ti natnag.

⁷Naan-anay ti panagtalekko kenka, O Dios, agdaydayawak kenka ket agkantaak!

⁸Agriingka, O kararuak! Agriingkayo, salterio ken arpak ket riingek ti bannawag!

⁹Idaydayawkanto kadagiti tattao, O Apo, Ikantakto ti pagyamanko kenka.

¹⁰Tumukno sadi langit ti di agbalbaliw nga ayatmo; dumanon ti kinapudnom iti tangatang.

¹¹Ipakitam ti kinatan-okmo, O Dios, iti tangatang, ken ti dayagmo a mangpunno iti entero a daga.