Read Iloko Psalms 58 Bible Online

Psalms 58 - Iloko bible

Psalms 58

¹Dakayo nga agtuturay, nalinteg met la ti pangngeddengyo? Nalinteg met la ti panangukomyo kadagiti tattao?

²Saan! Ti la panagaramid iti dakes ken panagranggas ti pampanunotenyo! Pasig a kinaranggas ti kayatyo nga aramiden iti daga.

³Manipud pay pannakaipasngayda, dagiti managdakdakes nayaw-awandan; manipud pay pannakayanakda, ulboddan.

⁴Kasda la uleg a napno iti gita; apputenda ti lapayagda, kasla tuleng a kobra

⁵a dina mangngeg ti timek ti mangkaykayaw iti uleg, wenno iti balbaliksen ti nalaing a salamangkero.

⁶Pusiem dagiti ngipenda, O Dios; bag-utem dagiti saong dagitoy narungsot a leon.

⁷Mapukawda koma a kas danum ti ages-es-es a karayan, malaylayda koma a kas ruruot a mapayatpayatan iti dalan.

⁸Maipadada koma a kas kadagiti bisukol nga agbalin a pitak, wenno maladaga a natay, saanna man la nakita ti lawag.

⁹Kasda la koma ruot a pagammoan la ta magapas; iti napalalo a pungtot ti Dios, maipalaisdanto uray addada pay a biag.

¹⁰Inton madusa dagiti managbasol, agragsakto ti nalinteg; agdigosto dagiti sakana iti dara dagiti managdakdakes.

¹¹Kunanto dagiti tattao, “Pudno a magunggonaan dagiti nalinteg; awan duadua nga adda Dios a mangukom iti lubong!”