Read Iloko Psalms 59 Bible Online

Psalms 59 - Iloko bible

Psalms 59

¹Isalakannak kadagiti kabusorko, O Diosko; salaknibannak kadagiti mangdarup kaniak!

²Ispalennak kadagiti dakes a tattao; ikanawanak kadagiti mammapatay!

³Kitaem! Agur-urayda a mangisikat kaniak; agtitimpuyog dagiti naranggas tapno busorendak. Sipapardasda nga agturong iti pagsanebanda nupay awan basol wenno salungasingko wenno aniaman a labsingko.

⁵Agriingka, O Apo Dios a Mannakabalin, ket umaynak tulongan; sika a mismo ti kumita, O Dios ti Israel! Bumangonka ket dusaem dagiti nasion; dagiti managdakdakes ken mangliliput dimo kaasian!

⁶Rinabii nga agsublida iti siudad; kasda la aso nga agtagtaguob bayat ti panagdakiwasda.

⁷Denggem ti panagtabtabbaawda! Kasla kampilan dagiti balikas a rummuar iti ngiwatda, ta ipagarupda nga awan ti makangngeg kadakuada.

⁸Ngem sika, O Apo, katkatawaam ida; pagang-angawam dagiti amin a nasion!

⁹Agtalekak iti pigsam ket, awan ti pakaan-anoak; sika, O Dios, ti pagkamangak.

¹⁰Umayto ti mangay-ayat kaniak a Diosko; ipakitananto ti pannakaparmek dagiti kabusorko.

¹¹Dimo patayen ida, O Dios, tapno di manglipat dagiti tattaok. Babaen iti pigsam, warawaraem ken dadaelem ida. Sika ti salaknibmi, O Apo!

¹²Pasig a basol ti balbaliksenda; matiliwda koma iti kinatangsitda! Agsipud ta agilunod ken agulbodda,

¹³dadaelem ida iti pungtotmo; wen, dadaelem ida agingga a mapukawda. Iti daytoy, maammoan a ti Dios ti agturay iti Israel, ket ti amin a daga ti sakupen ti pagturayanna!

¹⁴Rinabii nga agsubli dagiti kabusorko iti siudad; kasda la aso nga agtagtaguob bayat ti panagdakiwasda.

¹⁵Wen, arigda aso nga agbirbirok iti kanenda, ket agririda no bassit ti masarakanda.

¹⁶Ngem agkantaakto iti maipapan iti bilegmo; wen, binigat nga ikantak ti di agbalbaliw nga ayatmo. Ta sika ti sarikedked ken salinongko no adda rigatko.

¹⁷Idaydayawkanto, sika a salaknibko; ta sika, O Dios, a mangay-ayat kaniak ti sarikedkedko.