Read Iloko Psalms 62 Bible Online

Psalms 62 - Iloko bible

Psalms 62

¹Anusak nga urayen ti panangisalakan ti Dios kaniak; isu laeng ti pagpannurayak.

²Isu laeng ti mangaywan ken mangispal kaniak; isu ti sarikedkedko, ket awan ti makaparmek kaniak.

³Kasano kabayag a dadaelenyo ti maysa a tao nga awan dumana iti alad a marmarba?

⁴Kayatyo la nga ipababa iti natan-ok a saadna; pagragsakanyo ti kinaulbod; naimbag ti panagsasaoyo kenkuana, ngem ilunlunodyo met iti kaungganyo.

⁵Ti Dios laeng ti pagtalkak, ta isu ti paggapuan ti namnamak.

⁶Isu la ti mangaywan ken mangisalakan kaniak; isu ti sarikedkedko, pulos a saanakto a maan-ano.

⁷Adda iti Dios ti salakan ken dayawko; isu ti nabileg a mangsalluad kaniak, isu ti pagkamangak.

⁸Tattaok, agtalekkay iti Dios iti amin a tiempo! Yamangyo kenkuana ti amin a parikutyo, ta isu ti pagkamangantayo.

⁹Anges ti kayarigan dagiti tattao; awan kaes-eskanda, nangato man wenno nababa. No pagtitiponen a timbangen ida, awan duma iti anges ti kalag-anda.

¹⁰Dikay agtalek iti aramid a naranggas; diyo namnamaen nga adda magun-odyo iti panagtakawyo; uray no umadu ti sanikuayo, saan nga isu ti pagtalkanyo.

¹¹Saan la a namimpinsan a nangngegko ti kuna ti Dios nga adda kenkuana ti pannakabalin,

¹²ken saan nga agbalbaliw ti ayatna. Sika, O Apo, gunggonaam ti tunggal maysa kas mayannurot iti aramidna.