Read Iloko Psalms 64 Bible Online

Psalms 64 - Iloko bible

Psalms 64

¹Mariribukak, O Dios; ipangagmo kadi ti asugko! Mabutengak kadagiti kabusorko! Isalakannak kadi.

²Salaknibannak iti panangisikat dagiti managdakdakes; ispalennak iti bunggoy dagiti nakillo a tattao.

³Patademenda ti dilada a kas iti kampilan; kasla pana a maibiat dagiti naranggas a saoda.

⁴Sanebenda dagiti naimbag a tattao, kellaatenda ida a panaen, ket pulos a dida agbuteng.

⁵Agpipinnaregtada a mangibanag iti dakes a gandatda, pagtutulaganda ti pangipakatanda kadagiti palab-ogda. Kunada: “Masapul nga awan ti makakita kadagitoy.”

⁶Agpanggepda iti dakes ket kunada, “Naplanomin ti kasayaatan a palab-og.” Saan a matukod ti puso ken isip ti tao!

⁷Ngem panaen ida ti Dios, ket kellaat a masugatanda.

⁸Dadaelennanto ida gapu kadagiti balikasda, ket agwingiwingto dagiti amin a makakita kadakuada.

⁹Agbutengdanto amin a sangapada; ipakaammodanto ti inaramid ti Dios, ket utobendanto dagiti gapuananna.

¹⁰Agragsak dagiti nalinteg a tattao gapu iti inaramid ni Yahweh. Agkamangdanto kenkuana nga awan pakaan-anoanda; idaydayawto dagiti amin a naimbag a tattao.