Read Iloko Psalms 66 Bible Online

Psalms 66 - Iloko bible

Psalms 66

¹Dakay amin a tattao, agdaydayawkay iti Dios ket agdir-ikayo.

²Ikantayo ti dayag ti naganna; idatonyo ti nagloriaan a pagdayaw kenkuana.

³Kunayo iti Dios: “Nakaskasdaaw dagiti aramidmo! Nabileg ti pannakabalinmo, agkurno a sibubuteng kenka dagiti kabusormo.

⁴Agrukbab kenka dagiti amin nga adda iti daga, agkantada kadagiti pagdaydayaw kenka, agkantada kadagiti pagdaydayaw iti naganmo.”

⁵Umayyo kitaen dagiti inaramid ti Dios; nakaskasdaaw dagiti gapuananna iti imatang dagiti tattao.

⁶Pinagbalinna ti taaw a namaga a daga a nagnaan dagidi kapuonanmi. Sadiay, nagrag-okam iti inaramidna.

⁷Agturay nga agnanayon babaen iti pannakabalinna, ket dina isina dagiti matana kadagiti pagilian. Awan koma ti tumakder a bumusor kenkuana!

⁸Dakay amin a pagilian, agdaydayawkay iti Diostayo; ti pannakaidaydayawna idir-iyo.

⁹Inaywananna ti biagtayo, ket dina impalubos a matnagtayo.

¹⁰O Dios, sinuotnakami; ginugorannakami kas iti pirak.

¹¹Impalubosmo a maipalab-ogkami; nadagsen ti impabaklaymo kadakami.

¹²Binay-am dagiti kabusor a mangibaddek kadakami; apuy ken layus ti naglasatanmi, ngem impannakami iti awan pakaan-anoanmi.

¹³Mangyegakto kadagiti mapuoran a daton iti balaymo, ket tungpalek dagiti karik kenka.

¹⁴Wen, itedko ti imbagak idi nariribukak.

¹⁵Mangidatonakto iti karnero a mapuoran iti altar. Mangidatagakto kadagiti toro a baka ken kalding, ket ngumatonto ti asuk iti tangatang.

¹⁶Umaykay agdengngeg, dakay a managbuteng iti Dios, ta saritaek ti inaramidna kaniak.

¹⁷Nagdawatak kenkuana a tulongannak; indaydayawko babaen kadagiti kantak.

¹⁸No diak inkankano dagiti basolko, saannak koma nga impangag ti Apo.

¹⁹Ngem saannak la a dinengngeg ti Dios; sinungbatanna pay ti kararagko.

²⁰Idaydayawko ti Dios, gapu ta ti kararagko inna impangag, ket dina imbabawi ti napudno nga ayatna kaniak.