Read Iloko Psalms 69 Bible Online

Psalms 69 - Iloko bible

Psalms 69

¹O Dios, isalakannak! Ta pagattengngedkon ti danum ket dandaniakon malmes.

²Lumnedakon iti nauneg a gayong-gayong, ket awan natangken a pagbatayak. Addaak iti adalem a danum, ket lemmesendakon dagiti dalluyon.

³Nautoyanakon nga umaw-awag iti tulong, ket agmagan ti karabukobko; naapgesen dagiti matak a mangur-uray kenka.

⁴Ad-adu ngem dagiti buokko dagiti gumurgura kaniak nga awan gapuna; padpadaksendak dagiti kabusorko, napipigsada ket kayatdak a patayen. Ipabasolda a nagtakawak, paisublida kaniak ti kunada nga innalak.

⁵Ammom, O Dios, ti kinamaagko; saan a nailinged kenka dagiti basolko!

⁶Saan koma a siak ti gapuna a maibabain dagiti agtalek kenka, O Apo a Dios a Mannakabalin-amin! Saan koma a siak ti gapuna a malalais dagiti agdaydayaw kenka, O Dios ti Israel!

⁷Sika ti gapuna a naum-umsiak, ket iti bain nalapunosak.

⁸Kadagiti kakabsatko, sangsangaili ti kayarigak; kaslaak ganggannaet iti familiak.

⁹Kasla gumilgil-ayab nga apuy ti panagayatko iti Templom; siak ti nagtinnagan dagiti umsi a maiturong kenka.

¹⁰Babaen iti panagayunar, agpakumbabaak ket gapu itoy, maum-umsiak.

¹¹Agpanesak, ket katkatawaandak.

¹²Kadagiti kalkalsada, sarsaritaendak; agputar dagiti mammartek iti kankanta maipapan kaniak.

¹³Ngem no siak, agkararagak kenka, O Apo. Sumungbatka O Dios, iti kayatmo a tiempo. Ipangagnak gapu iti ayatmo a naindaklan, gapu ta tungpalem ti karim a mangisalakan.

¹⁴Lumnedakon iti gayong-gayong, ispalennak. Salaknibannak kadagiti kabusorko; iti adalem a danum, alawennak.

¹⁵Dimo kad ipalubos a yanudnak ti layus; dimo itulok nga alun-onennak ti yuyeng, dimo itulok a lumnedak iti tanem.

¹⁶O Apo, iti kinaimbag ti di agbaliw nga ayatmo ipangagnak; iti naindaklan a panangngaasim, taliawennak.

¹⁷Dimo kad ilemmengan toy adipenmo; sungbatannak a dagus ta kasta unay ti panagtuokko!

¹⁸Umayka ket isalakannak; kadagiti kabusorko ispalennak.

¹⁹Ammom ti pannakaum-umsik, ti pannakaibabain ken pannakalalaisko; makitam dagiti amin a kabusorko.

²⁰Gapu iti pannakaum-umsi, nagdara toy puso, ket ti naan-anay a namnamak napukawko. Nangnamnamaak iti asi ngem awan nangngaasi kaniak; nagur-urayak iti pannakaliwliwa ngem naupayak.

²¹Inikkandak iti sabidong idi mabisinak; pinainumdak iti suka idi mawawak.

²²Agbalin koma dagiti padayada a pakadadaelanda; sapay koma ta pakatnaganda dagiti fiestada.

²³Pagbulsekem ida tapno dida makakita; kanayon a pagtigergerem ida!

²⁴Idissuormo kadakuada ti pungtotmo; layusem ida iti rungsotmo!

²⁵Mabaybay-an koma a madadael ti kampoda; awan koma ti agnaed kadagiti toldada!

²⁶Idadanesda dagiti dinusam; sarsaritaenda ti panagsagaba dagiti dinangram.

²⁷Isuratmo dagiti amin a basolda; dimo iraman nga isalakan ida.

²⁸Iti libro dagiti sibibiag mapunas koma ti naganda; iti listaan dagiti tattaom, mailaksidda koma.

²⁹Ngem nakakaasi ken matutuokak, ket napukawen namnamak; arayatennak, O Dios, isalakannak!

³⁰Agkantaakto nga agdaydayaw iti Dios; ipakaammokto ti kinatan-okna babaen iti panagyamanko kenkuana.

³¹Ad-addanto a pagragsakanna daytoy ngem iti baka wenno toro a baka a maidaton kenkuana.

³²No makita daytoy dagiti maidadanes, agragsakda; dagiti agdaydayaw iti Dios, maparegtada.

³³Ipangagna dagiti nakurapay ken adda kasapulanna, ket laglagipenna dagiti naibalud a tattaona.

³⁴Dayawenyo ti Dios, dakayo a langit ken daga, dakay a baybay ken amin a parsua nga agnaed kadakuada!

³⁵Ta isalakanto ti Dios ti Jerusalem, ket bangonennanto manen dagiti ili ti Juda. Agnaedto sadiay dagiti tattaona, ket tagikuaendanto dayta a daga.

³⁶Tawidento dagiti kaputotan dagiti adipenna ti daga ket agnaedto sadiay dagiti agayat kenkuana.